Monthly Recollection of Priests of Kalay Zone (16.1.2021)
Tuni Kalay Zone aa om Siampi tengin Khasim in a bawl uh Pasian thu lungngaihna pen Kawlpi Siadaw huangah bawl khawm uh hi. Tua sungah Zingsang thungetna, Siampite ii Office Reading thungetna te ngetkhop khiteh Pyidawtha Topa Rev. Fr. Andrew Cin Go Lian in minutes (40) sung (Mangmuhna 21:5) na bulphuh in a hoihlo nate khempeuh a hoihin a thakin kipuahphat ding zia, hunzui-in Kawlgam sung Media nasepna te a khantoh zia cih te hong gen hi. Tua khitteh mawh sutna hun, khikhin khopna, tawmvei sung daitak in Pasian thu lungngaihna hun leh (Midday Prayer) Siampite ii Sun hun in a thungetna te uh ngetkhopna te om in hun man ciangin thuzaksak na tuam tuam zong om hi.
Tua sungah Diocesan Chancellor Fr. Maximian Pau Sian Mung in Covid-19 natna hang tawh tukum Annual Retreat Diocese buppi in om thei lo ding (June Kha) ciangin bawl pan ding cih thu leh (Annual Return, Collection, Tith leh Transfer) te pen kumdang aa mah bangin zui ding cih thu hong gen hi. Tua khitteh Minor Seminary Rector Fr. Robert Pau Gin Mung in tukum Brother te Maymyo ah sangkah theih nang Entrance February kha sung a phi ding pen Kalay Diocese pan mi-1, Hakha Diocese pan mi-4, St. Theresa Little Way pan mi-4 cih bangin om hi tua te in lai hoih takin a On zawh nangun thungetsak ciatni cih thu hong gen hi.
Tua khitteh Bishop Felix in Deacon Ordination a ngah sa teng a hun lem khat gelin Priestly Ordination piak theihnang Priestly Council teng in thukikupna neih ding vai teng hong pu laak khia hi.
Tua ban ah Phai Parish Priest Fr. Damian Zam Sian Dal in a ma-ii Catholic Pawlpi sunga a kizang laimal thupi phadiak te ii a khiatna (Catholic Dictionary) Manglai pan in Kawl lai in a at pen Catholic Theology tawh kituak in a ki at hi-in Pawldang te muh dan te leh manglai mal tuam tuam te tawh a khiatna a ki lamdan zia te a kigelh ahih manin hoih mah mah hi. Topa te aa ding leh a diak diak in Thuhilhsia te leh Sister te aa dingin ki zang thei pha mah mah ding a hih manin Topa in hong lei uh la, na Parish sung teng uh ah bukhat (3500) bek in na zuak sak uh cih thu te hong gen khia hi.
Tua ban ah Hakha Diocese pan Fr. Joseph Ki Khui Um in zong Hakha Diocese aa om Siampi te in a maute ii Zone ciat ah Pasian thu lungngaihna bawl ding ahih manun a maute aa dingin zong thu ngetsak ni ci-in hong tangko hi.
Tua khitteh Sunan ne in nuam takin om mun ciat ki zuan hi. Tuni Pasian thu lungngaihna ah Siampi leh Deacon (22) ki helthei in tha kingah mah mah hi.
By- Fr. Joseph Zo Mung
2021-01-16 06:47:45
