Piantit gam aa om (MEP) Siampi te sung pan a makai pipa Rev. Fr. Vincent Se’ne’chal tuni Assumption Intermediate Siampi Sinna sangah hong pai-in Siampite le Sangnaupang te in nasia tak in muakna nei uh hi.
Sun an nek khitteh hun tom no khat bawlin Rev. Fr. Paulinus Thang Muan Lian (Rector) in vaidawnna leh Assumption Seminary sang ii tang thu leh tu laitak in a nasep zia te uh genna nei hi.
Tua banah Sanginn lam na ding leh puah kik na ding huhna sum a piakna te leh Solar mei a piakna te tung ah lungdamkohna nei hi.
Tua khitteh Sangnaupangte in la hoih mahmah khat sakna nei-in tua khitteh Fr. Vincent in thu genna nei hi.
A mah in noteng kong muh ciangin tha ngah mahmah ing. Note pen Pasian ii hongitna mi dangte tungah ah a hawm khia ding te na hih manun thupi mahmah hi uh teh. Pasian hongpiak talent te Pasian aa dingin limtakin zang kik leng Pasian in leitung ah a zah zakhat a hong piak kik ding cih thu leh ih sih khit ciangin zong tawntung nuntak nopsakna hong pia ding cih thu phawkin Siampi a suak lo te zong mi hoih, makai hoih, Papi hoih na suah nangun hanciam un ci-in thapiak na nei hi.
Tua khitteh Rev. Fr. Mathiou Ludovic (Spiritual Director) in Sangnaupangte tangin lungdam kohna thu agenna ah Piantit gam pek pai-in kote tha pia dingin hong pai na hih manin tha ngah mahmah ung mailam ah zong hong pai zelzel in ci-in lungdam kohna thu gen hi.
Tu laitak in Assumption Intermediate Seminary ah Sangnaupang (29) leh Siampi (3) om in apua lam pan laihilh ding Sia (3) sambeh a bih manin mi (6) in Subject tuamtuam tawh lai hilhna nei uh hi.
