Tuni Misite Kha khempeuh aa ding thungetsak ni Kalay Diocese hongcing hongkem Bishop Felix Lian Khen Thang makaihna tawh Christian Cemetery Duwin Chaung ah Missa Biakpiakna ki bawl in tua sungah Siampi (18) leh Deacon (2) kihel thei uh hi.
Msgr. John Deng Cin Khup in Misite Kha aa ding thungetsakna ii a thupitna thu gen hi. Tua agenna sungah misite a sih zawh a sawt cingin ki manghilh hi ci-in kawlte paunak om hi mah ta leh Catholic Pawlpi in manghilh ngeilo in thu ngetsak den ahih na thu kiciang takin hong gen hi.
Tua banah Catholic Pawlpi pen Vangtungmi/Misiangthote, Leitung ah a nungta laite leh Gimna neu sunga om kha te cih bangin nam thum a kizom den ih hihna thu leh Gimnaneu a om manin misite kha aa ding thu a ngetsak ih hih na thu te zong hong gen hi.
Tua khitteh Pawlpi ii upna thuthuk ahi Misiangtho te kipawlna, mawh maisakna, misite hinkikna leh tawntung nuntakna thu te ka up hi ci-in upna ih kiciamna te ih teltheih semsem na dingin, Misiangtho te, gimnaneu sunga omte leh a nungta lai eite tawh ih kizopna te mikim ii teltheih dingin hong gen in tha kingah mahmah hi.
Missa Biakpiakna a man khitteh Han thupha piakna, Lawban taihna leh Tuisiangtho thehna te a ngeina bang mah in ki bawl hi. Missa Biakpiakna hun sung thungetna lasakna a hi Biakpiakna tawh a kisai teng pen Tahan St. Theresa Parish in tavuan vaipuak la in thungetna leh lasakna te zong zaknop in tha kingah mahmah hi.
Hun man ciangin Rev. Fr. Joseph Kap Tung Nung (VF of Kalay Zone leh PP of Tahan) in Han tawh kisai Committee panmun telthakna a ngah teng hong tangko khia in maikum ciang vaipuak a nei ding pen Munlai Parish a hihna thu te zong tangko khia hi.
Tu kum pen kum dang sangin mi kitam zaw pekin huang sungtengah mawtaw leh Cycle te zong tam mahmah in parking ding zong hamsa ta hi. Gate pan Missa Biakpiakna mun dong pen mipi te khe tawh a ki pai hita hi. Mipi pen Missa Biakpiakna hun sungin tulnga (5000) kim pha dingin ki lamen hi.