Kalay Zone aa om Siampite ii kha sim aa a neih Pasian thu lungngaihna pen Rev. Fr. Matheou Ludovic makaihna tawh Kalaymyo Siadaw Huang ah ki bawl hi.
Amah in (Mt 7:14) “Bang hang hiam cih leh nuntak tawntungna hong tunpih kongpi kawcik a, lampi haksa ahih manin, tua lampi a mu mi tawm hi” cih bulphuhin thu gen na nei hi.
Amah in Pa Pasian in eite thupha a hong piak ciangin Singlamteh tawh hongpia hi. Ih thuak haksatna te tung tawnin Pasian in thupha hongpia hi. Tua ahih manin haksatna ih thuak ciangin lungkiat loh ding thu gen hi. Topa Jesu in zong a nung zuipite tung ah lau kei un ci-in (Mt 14:22 )Take courage ci-in a nung zuite tha na pia hi. Tua a hih manin ih nuntakna ah haksatna tuak limlim ding cihna hi-in haksatna ih tuah ciang lungkia lo-in Topa tung pan tha lak ding kisam hi ci-in gen hi.
Tua ban-ah eite ih lau taktak bang a hi hiam? Ih nuntakna ah ih kisap taktak bang a hi hiam ci-in ngaih sun taktak leng ih buaipih penpen na te pen ih kisap penpen te zong na hilo thei kha ding hi. Tua ahih manin a thupi penpen te mah ih buaipih pen ding kisam hi ci-in hanthotna pia hi.
Tua khitteh Pasian thu lungngaihna, Mawhsutna, Khikhinna leh sun hun thunget khopna te tawh hun ki mansak hi.