Tuni CBCM leh Kalay Diocese Zumpi panin laihawm khiatna tawh kizui-in Kalay Diocese hongcing hongkem Siampilian Felix Lian Khen Tang ii makaihna tawh Kalay Diocesan Pastoral Centre ah Kawlgam, Middle East leh Leitung buppi ah lungnop kilemna a om na ding lungngulhna tawh antan thungetna noptakin kibawl hi.
Tua sungah Kalay Diocese sunga om nungak Siangtho (Religious -CRCK) teng namkhat pan a tawm pen minih ta kihelin tua banah Diocese zumpi aa nasem teng leh Siadaw huang aa om Siampi teng tawh Siampi (10) leh mipi (100) kim kipha hi.
Hun zat den pen Zingsang thungetna ngeina teng nget khitteh Rev. Fr. John Pau Sian Thang in Lungnop kilemna leitungah bangci bangin kingah thei ding cih thu leh thungetna ii vangliatna thu te gnna nei hi.
Tua khitteh Khi khinna (150) vei ki nei phot in tua khitteh Siampilian pa makaihna tawh Missa Biakpiakna ki nei hi. Missa Biakpiakna sungah Siampilian pa in Misiangtho Francis Assisi ii thungetna ahi “Topa aw nangma lungnop kilemna te mite tungah a puak kawikawi dingin kei hong zangin” a cih kammal bulphuhin eite khempeuh in lungnop kilemna ih ngahna dingin na asemkhia te ih hih zawh nang hanciam ciatni ciat ni ci-in kha-an vakna hong nei hi.
Missa Biakpiakna aman khitteh Kawlgam leh Middle East te pan kipan Leitung buppi ah Lungnop kilemna a om nang antan thungetna nop tak in ki man siang hi.
