Kalay Zone Sunga om Thuhilhsia te Pasian thu sinbehna pen November 25 ni pan 28 ni dong ki bawl ding hi. Tua sungah Kalay Diocese acing akem Siampilian Felix Lian Khen Thang in 25 ni zingsang nai (8:30 -9:30) dong hun hon thu genna nei-in thu khitteh Thuhilhsia teng tawh Group Man kilakna nei hi.
Siampilian pa hun a man khit pan ki panin Rev. Fr. Paulinus Thang Muan Lian in Pawlpi Tangthu leh Rev. Fr. Joseph Pau Lian Kham in Khangno leh Cidamna cih thulu te tawh Tintan piakna November 26 ni dong nei ding uh hi.
November 27 ni Zingsang nai (8:30 – 12:00 ) dong Rev. Fr. Joseph Thang Nen Zo Mung in Pasian thu lungngaihna makaih ding hi. Tua khitteh nitak lam teng pen Msgr. John Deng Cin Khup in Mawhsutna leh Siangtho Pumpi Biakna (Benediction) teng makaih ding hi.
November 28 ni pen Kalay Zone aa om Parish Priest teng leh Thuhilhsia teng thu kikupna om ding aa sun an nek khit teh Thuhilhsia teng a inn ciat uh ah ciah thei ding uh hi. Hih hun sung teng Khasiangtho Pasian in Thuhilhsia te leh a makaihding Siampi te a ompih den nangin thu ngetsak ciat ni.