Siampi te, Siadaw te khatlekhat ki lawmtatna neihding leh thuzui te tawh kinai kizopna neihding kisam hi.

By Linda Bordoni
20 Sep 2019
Vaticanews

Casa Santa Marta biakinn ah akibawl Missa Biakpiakna sungah Siadaw te, siampi te adingin thungetsak un, ci-in Pope Francsi in thumna nei hi. Siampi zaa angah te khatlekhat kilawmtatna nei in, Pasian mite’ahi, thuzui te tawh kizom kinai theihnading, Pope in a hanthawn hi.


Paul in Timothy a thuhilhna Laisiangtho mun siksan in Pope Francis in thu agen hi. Siampi za ahi, Pasian piak letsong pen zangkhailoh na ding Pope in genbelh in nei hi. Siampi nuntakna athanem sak thei, sumlepai, migensiatna, ahai huai kamkingialna thu te agen hi.

Pasian’nasem te ahi; siampi-deacon-siadaw te in sumlepai te a thupitsak luat ciangin, siatna khempeuh i phungpi ava bel ahi hi, ci-in “Sum deihluatna in siatna namkim piangsak hi,” cih Paul i kammal siksan in, Pope in thuhilhna hong nei hi.

Pasian tawh kinaina
    Siadaw te, siampi te, deacon te’tung athuhilhna ah Pope in kinai, kihawh, kilawmtatna neiding akisapna thu gen hi.

Pasian’nasemte khatlekhat kinaina apiangsak lampi dawl(4) Pope in hong genkhia hi.

    Amasa pen in Siadaw khat i cih in Pasian tawh akinai pen pa ahi hi. Deacon i cih pen meigong tagahte adingin huhna, panpihna apha zaw in piakzawh nadingin Nungzuipite in ateelkhiat te ahi uh hi. Peter gen mah bangin, Nungzuipite’ nasep ahi; ei Siadaw te i nasep pen “thunget ding leh Pasian thu tangko ding” ahi hi. Tua ahih man in Siadaw te i nasep thupipen in thunget ding hi. Thungetna in thahatna hong guan in, Siampi zaa i manphatna hong phawk sak kik hi, ci-in Pope in gen hi.


Siampi te tawh kinaina
    Siadaw te in a simpi te, deacon te, amau’nasep khop pih te tawh kinai, kihawh ding akisapna thu zong Pope in a gen hi.
    Siadawte in a siampite amangngil pen a dahhuai mahmah thu ahi hi. Siampi khat in a Siadaw pa tawh kimuh kiho khuan ngahlo, kimuh hunding tawmbek ciangtan sak, cih thu kazak ciangin khasiat huai kasa mahmah hi. Siampi te in pa khat ka nei hi, cih pen lungdamtak in a theihkhak aphawk khak dinguh ki sam hi, ci-in Pope in gen hi.


Siampi te khatlekhat kinaina
    Siampi te khatlekhat kinaina, kihawhna akisapna thu zong Pope in a genbeh lai hi.
    Simapite’kikal ah kikhen-kidei danna pen dawimangpa nasepna ahi hi. Hibanga kikhen-kidei danna in hehpih thuakpihna anei pawl (ahihkeileh) ngaihsut muhna thupisak pawl ( symphthies or ideologies) cih bangin kikhen thaangna piangsak hi. Tua ahih manin, kinai nading lampi dawl (3) na pen siampi te khatlekhat kinai, kihawh, kilawmtatna akisapna thu ahi hi, ci-in Pope in hong genbeh hi.

Thuzuite tawh kinaina
    Lampi dawl (4)na pen Siadaw te, siampi te in thuzuite tawh kinaina thu ahi hi.
    Paul in Timothy kiang alaikhak nih na (2Tim 1:5) ah na pi leh na nu mangngilh kei in ci-in vaikhak hi. Akhiatna in ama piankhiatna bulpi a mangngilh lohding a gen nopna ahi hi, ci-in Pope in Laisiangtho i a deihna hong genkhia hi.
    Siadaw te, siampi te ahi; note in na mite uh ahi; thuzuite mangngilh kei un, na piankhiatna bulpi uh mangngilh kei un. Thuzuite tawh akinaina mun ah om tawntung un, ci-in Pope in thuhilhna nei hi.
    Siadaw khat in thuzuite tawh akigamlat ciangin, ama i Pasian’nasepna tawh akisai lo ngaihsut veina te’ nung a zui ahi hi. Tua bang ahih ciangin amah in Pasian’nasem hi lo hi. Pasian’sila hi lo hi. Amah in asan sa thupha lianpi ahi; siampi zaa letsong pen a mangngilh hi.

Pope in hih kinaina nam (4) te: Pasian tawh kinaina, Siadaw te in a siampi te tawh kinaina, Siampite khatlekhat kinaina, Thuzuite tawh kinaina, a mangngilh lohna dingun Pasian’nasemte’kiangah hanthawn in athugen akhuup hi.
    Hih kinaina nam(4) te nuntakpihna tawh kote’tungah hong kipia Pasian letsong pen akem cingzo dingin, na siampi te, siadaw te ading thungetsak un, ci-in kikhopna ah akihel mipite tungah Pope in thuumna a nei hi.

 
Translated by Paul Lian