Hun nautaang sungah banghangin biakpiakna puan a eng ki zang ahi hiam?

A eng lim in lametna leh nuntak khantohna hong lak hi.

        Catholic Pawlpi i biakpiakna thukhun sungah aom mah bangin biakpiakna puan eng te nipi ni te leh nipikal sung ni te ah kumkhat sung tawntung ah i mu kha den hi. Hih puan eng te pen “Hun nautaang sung”ah ki zang phadiak hi. Ahi hangin a nautaang, a thupilo cihna hituan samlo hi.

        Amasa pen in a eng cihpen nungta in hing a, khanto hi cih khiatna nei hi. Khuakhal hun leh tuk kipat hun cihte hong phawksak hi.

        Nicholas Gihr in “The Holy Sacrifice of the Mass” cih ama laibu sungah a eng cih pen ahin singkung leh huan te hong phawk sak hi.

        A hinmel ahi a eng pen Pawlpi i hihna tawh zong aki zom ahi hi. Pawlpi cih pen singkung golpi ahi hi. Tua singkung pen vantung dongin sangto in ahiang te zaam in tawlngakna limhoih hoih pia hi. Leitang adingin thupha a piangsak singteh tampi zong om hi. A etlawm mahmah a paak hoih mahmah te zong nei hi. Gamtat hoihna thupha gah tampi te apiangsak hi. Pawlpi pen Christu Topa i a nopci huanpi ahi hi. Tuucing hoih ahi Topa in a tuuno te  ahing kikel lono namun ah hongkha hi. Pawlpi pen biakpiakna puan eng te tawh ki tuam hi. Tua in Pawlpi i lungnopna lahna, vangtung gam Paradise sungah a om a it huai leh a tawntung lono na gam i lametna hong lak hi. Vangtung gam in a mangngeilo ding minthanna khaam lukhu leh a kisia theilo gamh te lametna hong lak hi.

        Tua a hihman in a eng lim in Pasian kamciam vangtung gam hong tunpih ding ahi kha nungtakna a picin nading hong hanthawn hi.

        Eccelsiastical Review sungah biakpiakna puan te pen a eng mel aki zatna pen “ singkung lopa hing dildial, nimdialdial te, i mitkha ah hong musak a, lametna leh lungnopna thu honghilh hi” ci-in gen hi.

        A eng mel in nuntak khantohna honglak bek thamlo in, mailam nungtakna dingin lametna hong pia hi. “The Mass leh Biakpiakna puan te tawh kisai laiat John Walsh in “ A eng mel in lametna thu hong gen hi” ci-in a gen hi.

        Pasian kamciam na gam a zuan Christu galkap i hihman in gimin tawlin hamciam in i mainawt hi. Lampi ah thabei in i khawlcip khakloh ding thupi hi. Bang hanghiam cihleh, Christu mahmah in mihing suahna hongla in eite kiangah hong hawh aa, nuntakna thu hongguan hi. Amah Kha Siangtho tawh i tha hong dim hi. Tua a hihman in, nuntakna thak a nei singkung bangin i luahding gamah lametna bei sak lo in mainawt ding ahi hi.

        Hih biakpiakna puan eng in “Hun nautaang sung” i lungngaih ding Pasian thuhtuk tampi hong phawksak hi.

Fr.Paul Lian