Lungdambawl Thupuak!
Kilemna Om Ta Hen! (Pacem in Terris)

1. Kilemna omta hen-pacem in terris (Lk 2:14).  Hih kammal in Vanmisiangtho te’ kammal ahihi. Pasian’Tapa leitungah mihingin hongsuahna thu ahangin hih leitungah Kilemna Kumpia (2Cor 1:3-4) hongpai ahihna thu tangkona ahihi. Tua Kilemna Kumpipa in kilemna gam aphut dingin hihleitungah hongpai ahihi (Is 9:6-7). Ama ukna gamin kilemna tawh kidim dinga, beihun neingeilo dinghi (Is 9:6-7). Kilemna in Pasian’ukna, Pasian’ompihna, Pasian’ vangliatna, Pasian tawh nuntak khopna ahihi. Pasian’ Tapa leitungah mihing a ahongpai na in, leitung mihingte “kilemna lampi ah hongkha ding” (Lk1:79) a ahongpai ahihi.Tua banah, David kumpipa ii lunggulh Bethlhem tuikhuk tui in, Topa Jesu hong suahna hangin kilemna dangdawntui bangin hong luang khia ahi hi.(cf. 2Sam 23:15) Amahangin kilemna in “Guntui bangin aluangding a” (Is 48:18), “Thuman leh kilemna kihual khawmin khangkhia dinghi” (Late 85:10).

2. Pasian’ Tapa in mihingin zawngkhal takin hongsuahna tawh kilemna apiangsak hipah lo-in, kilemna lampi honglakkhiat nadingin, simmawh bawlsiatna nasia takin athuak khitteh, singlamteh tungahsihna hong thuak hi. Ni thum khit ciangin amah hong thokika, a nungzuipite tungah “Kilemna ngah ta un,” ci-in kilemna bucing amute tungah pia hi. (Jn 20:19)Hihthu hangin “Kilemna ding asem mite in thupha angah uhhi” (Mt 5:9) ci-in honghilh hi. Kilemna pen lunggulhna bek tawh a kingah thu hilo hi. Kilemna ihcih in amanpha penpen nuntakzia ahihmanin mantampi mah piakkik ding akisam pelmawh ahihi. Pasian’ Tapa in kilemna lampi honglah nadingin minlevang, etlawmnate leh deihhuaina khempeuhte suplawh bekthamlo-in, Pasian taktak hina pi-in, mihing hongsuakin, nasem khatbang in hong nungta hi (Philippians 2:6-7). Sila khat banga hong nuntakna tawh Pasian le Mihing, mihing le mihing kilemna ding hongsemkhia hi. Anunung ciangin, ama Sisan luankhiatna leh anuntakna apiakkhiatnatawh kilemna hongbawl hi. “Singlamteh tungah asihna tawh Christ in kilangneihna khempeuh beisak a, tua Singlamteh hangin minam nihte pawlkhat suahin Pasian kiangah hong tunpih hi” (Eph 2:16).

3. “Kilemna ding asemkhia mi in thupha angah hi. Banghanghiam cihleh Pasian’ tate cihna angahding uhhi” (Mt 5:9). Pasian’ Tapa leitungah mihingin hong suahna Pawipi bawldingin kumsialin kigingin lawpna tawh i-kidim hi. Pasian’ Tapa leitungah banghangin banghih dingin mihing suahna hongla ahi hiam? Banghangin eite in tua Pasian’ Tapa ii mihing suahna Pawipi i-bawlden hiam? Pasian le mihingte leh Pasian sungah minam khempeuh akilemsak ding nasep asemdingin Pasian’ Tapa in hih leitungah mihing suahna hongla ahihi. Amah in eite kilemna dingin hong kipia “Tapa naungek” ahihi; “Banghanghiam cihleh eite adingin Tapa naungek khat hong suaka, eite tungah Tapa khat hong kipia hi. Amah pen eite hong ukpa hi dinga, ama min pen ‘Lamdang Thulakpa, Vanglian Pasian, Tawntung Pa, Kilemna Kumpipa’ Tapa’ kici dinghi” (Is 9:6). Amah in kilemna na asemding in hong kipia Tapa ahihi. Hihthu hangin Laisiangtho in “Kilemna ding adeih/alunggulhte in thupha angah hi”, nacilo-in, “Kilemna ding asem mi in thupha angah hi” naci bek hi.

4. Adam leh Eva savunpuan a silhsak Pasian in a Tapa Jesu mihing suahna hong lak sakna tawh leitung mite mawhna hakkol hong suah khiatsakin kilemna hong ngahsak hi. (Gen 3:20) Tua hongsuak ding naungek Jesu in eite kilemna dingin hong kipia ‘Tapa’ ahihi. Tua ‘Tapa’ anei mite in, tua ‘Tapa’ hangin ‘akilem mite’ leh ‘mite akilemsakte’ i-hih nadingin Pasian in tua ‘Tapa’ Kha Siangtho pen eite sungah hong buaksukin, eite khempeuh ama ‘tanu/tapa’ za hong ngahsaka, tua ‘Tapa’ tawh akibangin Pasian pen ‘Abba, Pa aw!’ ci-in saptheihna thupha hongpia hi” (Rom 8:15). Judea gam, Bethlehem khuano ah, Nungak Siangtho Maria sungpan in a hongsuak, Naungek Jesu, Kilemna Kumpipa, in kilemna nasepna pen khuaneuno khat pan hongpan khia hi (cf. Mt 2:5-6). Tuaban ah bawng annekna kuangsungah hong suahna, hong kisialna thu in, ‘Kilemna’ nasep pen ‘itna annkuang panin’ hong kipankhia hi cihthu honglak ahihi (cf. Lk 2:7). Bethlehem khua, ‘Bawng annekna kuang’ panin kilemna nasep hong pankhia a, anunung nitak annekna ah anungzui te’ khe asilsakna leh itna annkuang uumpihin amapumpi mahmah itna ann dingin, hongpiak natawh kilemna nasep hong kicingsak hi (cf. Jn 13:1-20).

5. Naungek Jesu, ChristuTopa’ mihing suahna honglakna i phawkna-in eite khempeuh kilemna ding nasepna tawh Pasian’ tanu/tapa taktak te ihihna athak athakin hong phawksak ahihi. Pasian’ tanu/tapa ahi eite khempeuh tu-in kilemna adeihte, alunggulhte bek hi nawnlo-in, kilemna nasep asemngiatte, kilemna ding lampi azuingiatte ihih ding Topa’n hong deih hi. Kilemna nasep in minlehvang kisuplawh thei hi; neihlelam kibeilawh thei hi; mite muhdah kithuak hi; mite telkhialhna kithuak hi; mite etneuna cilphihna kithuak hi; mite paampaihna leh zahkonate kithuak hi. Topa Jesu in Pasian leh mihingte kilem nading leh minam khatlekhat kilem nading na a sepna ah, akhitui, akhua-ul leh asisan luanghi. Ama minampihte in amah manin, namdangte khut sungah thahdingin ap uhhi. Kilemna ding nasep in khitui luangsakkha dinghi. I-mipihte mahmah ii muhdahna leh simmawh kosiatnate hong thuaksakkha dinghi. Ahizongin, Jesu Topa in tua kilemna asemding, kilemna lungdamna thu atangko dingin nanglekei hong deih hi.

6. Thukhupna:Topa Jesu Gumpain leitungah mihing suahna hong lakna tawh thusia pan thupha, kimuhdahna pan ki-itna, kitot kihauna pan kilemna ah hong tonpih hi. Tua banah bawngannkuang sung pan Calvary Singlamteh tungah sihna a thuak dongin, mawhmaisakna leh itna bek tawh kilemna hong lak lai hi. Tua hi a, Lungdambawl hun sungin, Kawlgam vaigam, gamsung gampua a om mi khempeuh tawh a kibangin, ei thuzuite khempeuh in Jesu Gumpa hong puak kilemna ngahin, tua kilemna tawh i tenna leitung, i khua i tui, i innkuan sung leh i pawlpi etlawmsak ni. Pasian hongpiak kilemna pen leitung hong piak kilemna tawh kibanglo hi. Hihthu hangin Topa Jesu in anungzuipite kiangah, “Note tungah keima kilemna kongpia hi. Leitungmite in apiaktheih akiplo kilemna ahikei hi” (Jn 14:27) ci-in, ama ‘kilemna’ hong pia ahihi. Topa hongpiak kilemna mite tungah apiasawn ding, Topa hong piak kilemna tawh mite akilemsak dingin Topa in eite ama tanu/tapa hong suaksak khin ahih manin, Pasian’tanu/tapa taktak ihihna pen kilemna nasep lianpi i-sepkhiatna tawhanuntakpihzo dente ihih zawh nadingin han ciam ciatni.
Naungek Jesu hongpuak thupha mimal kim tungah hong tung henla, nang le kei hangin sim leitungah kilemna hong tungtaktak tahen!


Christu sungah,
Msgr. Felix Lian Khen Thang
Kalay Diocese