Topa Jesu in

Pianpih Laiguizom Sanggam Dang Anei Hiam ? (2)

Topa Jesu in pianpih laiguizom sanggam pasal sanggam numei nei hiam nei lo hiam cihthu tawh kisai in, “Ta cil”, “Ta masa” cih tawh kisai in Laisiangtho tawh i enkhin hi. Tu in, Topa Jesu in pianpih laiguizom nu sungkhat suahpih sanggam dang aneih leh aneih loh Laisiangtho sungah bangci na kigelh cih thu i-en lai dinghi.

(i) Lk 2:41-51

Kumsimin Jerusalem khua-a Paisan Pawi a kibawlna-ah Jesu’ nu leh pa a pai zel uhhi. Jesu, kum sawm le nih aphak ciangin a ngeina bangin tua pawi-ah a thum-un a pai uh hi. Tua pawi vengin a ciahkik uh ciangin Jerusalem khua-ah naupang Jesu kinusia kha hi. Anu leh apa in a nusiatlam uh theilo uh hi. Amaute’  honlak mahah a omomin ngaihsun uh ahih manin nikhat lam paikhin uh a, tua ciangin a lawmte leh a tanaute lak khawng a zong pan uhhi.

Hih Laisiangtho sung hoihtak i simtel ciangin, kumsimin Jerusalem khua ah Paisan pawi sim dingin Jesu leh anu leh apa athum-un apai zel uh hi, ci-in na kigelh hi. Kum sawm le nih acin ciangin zong a thumbek mah un na pai hi cih thu na kigelh hi. Pianpih laiguizom sanggam dangnei hi zenzen leh, anu Maria leh a pa Joseph in tua ata a tanu dangte tonpih lo dingin a um a om ding hiam? Mi pawlkhat in tonpih lo hi ding hi, ci uh hi. Ahi zongin, Jerusalem khua a, a kibawl Paisan pawi pen, a khuakhua panin, innkuan kim in a kipai pelmawh Jew minamte ading pawi thupi mahmah hi a, Maria leh Joseph te in ata uh ahi Jesu tawh a innkuan kimtakin, Paisan pawi simin apai den ahi hi. Hih thu hangin, Maria leh Joseph in ata atanu dangte tonpih lo hi, cih ngaihsutna in, Jew ngeina tawh a kilehbulh thu  ahi hi.

Tua ban-ah, naungek Jesu hong muhloh uh ciangin, anu leh apa ahi Maria leh Joseph in innlak tanaute lak ahih keileh mihon lakah om hi ding hi ci-in ngaihsun hi, ci-in na kigelh hi. Asanggamte tawh om hi ding hi, ci-in, ngaihsun hi, ci-in, na kigelh lo hi. Sanggam dang nei hi zenzen leh anu leh apa in a sanggamte tawh om hi ding hi, ci-in ngaihsun hamtang dinghi. Tua ban-ah Biakinnpi sungah amuh ciangin, anu Maria in Jesu kiangah, “kei leh napa lungkhamin kong zongzong uh hi,” ci hi. “Ko napa leh nanaute tawh lungkhamin kong zongzong uh hi,” naci lo hi. Hih thute i et ciangin, Maria in ta dang tanu dang neilo a, Jesu bekmah nei a hihna thu Laisiangtho mah in hong theisak hi. Tua bektham lo-in, Jesu in sanggam laiguizom pianpih nei hi zenzen leh, anu leh apa in, naungek Jesu amuh loh ciangun, a sanggam dangte dong masa hamtang ding a hihna zong a theih huai leh aphawk huai thukhat ahi hi.

(ii) Mk 3:31-35

Tua laitakin anu leh a asanggamte (adelphoi) hong tung uh a, inn pualam ah ngakin, Jesu a sam dingin mi a sawl uh hi.Ama kiimah a tu mihonpite in, ‘Na nu leh na sanggamte, inn pua-ah om uh a, nang hong sam uhhi, a ci uh hi. Jesu in, ‘Ka nu leh ka naute i cih kuate ahi hiam?’ ci-in adong hi. Ama kimkotah atu mite en a, ‘Hih lai-ah ka nu leh ka sanggamte om uh hi. Pasian’ deihna bangin a gamta mi khempeuh ka nu leh ka sanggamte ahi uh hi,’ aci hi.

Hih Laisiangtho sungah a masa penpen in theih ding khatin, “a sanggamte” cih kammal ahi hi. Ei Laisiangtho pawlkhatte ah, “a naute” ci in, kiletkhia hi. Greek lai in, adelphoi hi a, “sanggam” cihna hi in, “anaute” cihna ahih lohna thu a masa in tel ding thupi hi.

Hih Laisiangtho sungah bang hangin, anu leh a sanggamte hong pai hiam? Banghangin a maute in Topa Jesu tawh kimu nuam uh hiam cihthu telsiang ding athupi mahmah khat ahi hi. Mk 3:20-30 sungah, mi pawlkhatte in Topa Jesu pen alungsim mannawn lo hi, ci-in, gen uh ahih manin, anu leh a sanggamte hong pai ahi uh hi. Hih munah theih ding athupi mahmah khat in, Jew minamte ngeina ah, tapa upa pente na sepna, genna vaihawmna khat pepeuh ah, sanggam laizom dangte in bangmah genkhuan, taikhuan, khakkhuan om kilkel lo hi cihthu ahi hi. Ahi zongin, Mk 3:21 na ah asanggamte in Topa Jesu thugenna panin, a khawlsak nuam a hihna thu na kigelh hi.

(iii) John 7:3-6 nasungah,

Ama sanggamte in Jesuh kiangah, ‘Na nung hong zui mihonte in na na sepna a muhtheih nadingun hih lai panin paikhia-in Judea gamah va pai in. Mite’ theih ding a utpa in a simthamin na sem ngei lo hi. Hih bangin na semsem na hih manin na sepna thu mi khempeuh theisak vet in,’ ci-in zahpihna tawh thu gen uh a, ama sanggamte mahmah in zong Jesuh umlo uh hi.

Hihthu hangin, Jesu nu tawh apai, a sanggamte (adelphoi) in ama laigui zom hilo bektham lo-in, a sanggamte sungah amah sangin a uzaw innlak sanggamte om hi cihthu hong theisak hi. A uzaw omlo hileh amaute in Topa Jesu thugenna ah bangmah pautheihna thu nei kilkel lo hi. Ahi zongin, Topa Jesu in pianpih laiguizom “u” nei lo a hihna thu Laisiangtho sungah teltak hong lak khin hi. Hih thu hangin, Topa Jesu kiang hongpai “asanggamte” acih in, pianpih laiguizom nukhat sungpan suak sanggamte cihna hi lo-in, innlak sanggam amah sangin a u hamzaw, apa no Clopas leh anu no Maria te ii tapa te ahi James, Simon, Josef te ahi hi, ci-in Laisiangtho siampen pa St. Jerome in na gelh hi.

Fr.Damian Dal