Naupang te tungah bawl ding thukhun nam (10)

          Hih a tunga thukhun nam sawm te bangin i naupang te tungah bawl le hang mailam ah mihing nuntakna pen  lungmuanna aom ding hi ci-in ka um hi.

          Tu hun khua hun paizai in naupang te pahtahna ah haksatna leh lungsim gimna tampi piang sak hi. Ahi hangin naupangte’ etteh u hamkhin sate khempeuh a dingin angtang huai leh lungnop huai thukhat hi, ci-in ka ngaihsun hi. Naupang I nu leh pa te, a innkuan pihte lawm le gual te,a sanggam u te, pi leh pu te, ni leh gangte khatpeuh na hihleh, tua naupang tungah etteh huai thu khatpeuh bawl le teh amah adingin cikmah hun in a amngthanglo ding thu hi pah hi.

          Naupang te’tungah etteh huai gamtatna i lak zawhna dingin a nuai aa thukhun te khempeuh zuipah dingin hong hanthawn ka hi tuankei hi. Ahi zongin a nuai aa thu pawlkhat in nang ading zatpah ding aki lawm thu hiding hi ci-in ka um hi. Tua bek thamlo in i naupang te pen I mailam adingin i muan I suan te hi uh a, mailam hun leitung thu asia apha pen amau khutsungah om gige ahih lam zong hih a nuai aa thu te in hong phawksak hi. Tua ahih man in naupang te bangci pattah a, bang ci panpih i hiam cihpen eite tung leh leitung thupiang te tungtawn in limlang bangin hong lengkik ding hi.

1.     Nang na khialh leh naupang te tungah thumkik in.

2.     Amau sangin u zaw ta ing ci-in a pilzaw a theizaw ki sapah kei in.

3.     Nang ading ahi zongin, midangte ading ahi zongin, naupang khat peuh in thu hoih khat a bawl ciangin na lungdamna thu gen in.

4.     Khialna khat peuh na bawl khak leh, khial mah ing, ci-in gen in la, na khialhna thu, amau te kiangah sianggen in.

5.     Naupang te’thugen ngaihsak in la, ki theih mawh bawl kei in.

6.     A gamtat zia dinga aki lawm gamtatna te hilh cian in.

7.     A etteh huai nuntakna tawh lamlak in.

8.     Itna, hehpihna, lainatpihna a neih na dingun hilh inla, sinpih in.

9.     Sepkhiatna khatpeuh ah asia ahih kei leh apha khat peuh in nungzuih den hi, cih thu tel sak in.

10.                        Amau te pantah in na etcin na ah nuamsa in. Amau te a picing mikhat hong suah theihna dingin lamlak in thuhilh theihna thupha leh vaipuakna neihna ah angtang in lungdam in.

Hih a tunga thukhun te pen nang nazuih zaw leh nazuih zawhlohna te thukhen na hilo in, naupang te in phattuamna angah theih na dingun zuih ding kilawm thu te cihna ahi hi. Hih thu te nang zongin hoih sa dingin ka lamen hi. Midang te zongin a theihna ding leh phat tuamna angah na ding un hawmsawn in theisak in.

Lianno