Pope in naungek Jesu suahna Bawngbuk athupitna thu apulak na

By Vatican News
1.12.2019

Naungek Jesu hongsuahna a lim muhtheih a i bawlna i athupitna leh a khiatna thu laihawmna sungah Pope in a gen khia hi. Italy gam, Greccio khuapi ah nipi ni sun, a va hawhkawm in tua Laihawm tungah letmat  a thuh hi.

Greccio khua i pen kum 1223 hun lai in mualtung aa om khua neukhat hi a, tua lai ah, Misiangtho Francis  of Assisi in Topa Jesu hongsuah phawkna in a masa penpen Bawngbukno a bawlna mun a hi hi.Nipi ni(1.12.2019) in Pope Francis tua khua ah va pai in a ma i Laihawm ahi: “A Zahtakhuai Lim (Admirabile Signum)” i thu a vagen hi.

A et-nophuai lim
    A Laihawm i athu lu “A Zahtakhuai Lim(Admirabile Signum)” pen Latin lai in a ki at hi a, Christmas Bawngbuk pen a et-nophuai lim ahihna thu hong gen hi. Hih Bawngbuk pen a tawngtung in lamdang sakna leh piandang sakna tawh hong ki dimsak lim khat ahi hi. Topa Jesu hongsuahna thu lim tawh bawlna pen Pasian tapa mihing suahna honglakna thuthuk pen oltak in telthei nading lungdamna tawh tangkona zong ahi hi.

A nungta kammal thu
    Naungek Jesu suahna Bawngbuk lim pen Laisiangtho bu sung pan ahong piangkhia a nungta Pasian kammal tawh ki bang hi. Christmas tangthu i lungngaih kikna hangin, mihing khempeuh tawh a ki mu dingin mihing suahna hongla Pasian i kiniam khiatna pan ahong luangkhia, Kha sungah nuntakna hong neisak hi. Eite mah bangin ahong pianna ding leh eite zong amah tawh pumkhat i suah theihna ding zahdongin eite hong itna lianlua mahmah hi, ci-in Pope in a Laihawm sungah a gen hi.

Innkuan sungah ngeina khat
    Naungek Jesu hongsuahna Bawngbuk lim pen i inn sungah bawl in ngeina khat in i zatding zong Pope in tha hongpia hi. Tua bek thamlo in, i nasepna Zumte, Sangte, Zatote, Thungte, khuasungte ah zong ngeina khat in i bawlding kisam hi, ci-in Pope in a gen hi. Hih banga ngaihsut siamna pen Pope in aphat kawm in, hih tangthu geilh anei, ngeina hoih pen cikmah teh i mangthan sakloh ding leh hih ngeihna hoih a zangnawnlo munte ah zong, kan kik zangkik a, anungta sakkik te i hihding ka lamet hi, ci-in Pope in a gen hi.

Laisiangtho aki siksan Naungek suahna Bawngbuk
    Hih Bawngbuk lim hong piankhiatna bulpi pen lungdamna Laisiangtho ahi hi. Hih leitungah mihing suahna ahongla Pasian’ tapa pen ganhing te’ annekna munah hong ki sial hi. Vantung pan hong kum khomun ka hi, ci-in ama i hihna thu ahong gen pa ii kisial masak na pen buhtuu lak ahi hi. Hih Bawngbuk lim in Topa Jesu’nuntakna sunga om thuthuk tampi hong lakkhia in, i nisim nuntakna ah lam honglak hi.

Greccio khua ah Misiangtho Francis i bawl’ Bawngbuk
    Kum 1223 hun lai in Misiangtho Francis aom ngeina ahi,Italy gam, Greccio khua ah, Pope Francis a va hawh hi. Tua lai mun ah amuh Bawngbuk in Bethlehem khua nawl a om Bawngbuk pen hong phawksak kik hi, ci-in Pope in gen hi. December 25 ni sim, nitak lam hun ciangin, Pasian adinga akipumpiak Friars te leh khuasung mite in pak hoih nono leh meivak te tawikawm in, tua Bawngbuk ah hong ki tuahden uh hi, ci-in Pope in a gen hi. Pope Francis tua laimun atun ciangin, buhtuu akikoih Bawng annekna kuangkhat, bawngtal khat leh la khat a mu hi. Siangtho pumpi leh Pasian tapa mihing hong suahna thu kizopna om hi, cih lahna in, Bawng annekna kuang pen siampi khat in Biakna tau in nei in Missa a bawl hi.

Hih ngeina akipatna
    Naungek Jesu hongsuahna thutawh kizui in, hih Bawngbuk lim ah lungdamna tawh kikai khawm in, amah hongsuahna thuthuk te kikup khopna tawh hih ngeina aki pan khia ahi hi. Hih bang ngimna te tawh Misiangtho Francis in hih bang ngeinahoih khat hong phuangkhia in Pasian thu a tangko ahi hi.

Pasian itna lim
    Hih Bawngbuk zepna te in Pasian hong itna hong lakkhia ahih man in i lungsim hongsu kha mahmah hi. Hih bang ngeina Misiangtho Francis in a patkhiat hun a kipan in Bawngbuk zepna lim tuamtuam te in, Pasian’tapa mihing suahna zawngkhal tak in honglahna, i lungngaih ding hongzawn hi. Hih zawngkhalna lim in huhna akisam i sanggam te tungah hehpihna i lahna tawh amah ading nasem in amah tawh ki lawmta te i hih ding, lam honglak hi, ci-in zong Pope Francis in a gen hi.

Bawngbuk zepna vante i akhiatna
    Naungek Jesu hongsuakna Bawngbuk i zepna dingin i zat vante i khiatna pen Pope Francis in a gen na ah, a gamdai mahmah khuamial lakah a phia leplep aksi te thutawh hong pan hi. Zankhuamial sungah i tuahkhak thu te i ngaihsut ciangin, Pasian in hong nusia lo cih pen i teltek hi. Amah tawh ki naina in khuamial tuamcipna ah khuavak hong taang sak hi. Gentheih haksatna tawh akidim khuamial sunga aom te adingin lampi man hong lak hi.

Aki bawl zia
    Pope in Bawngbuk zepna lim tetawh ki sai aki bawlzia a gen ciangin, tang inn lam dante leh innkisia thu te zong helden hi. Hih bang aki sia, a etlawmlo nate in mawhna sungah a pukthei mihing te a gen nopna leh, na khempeuh pen pello in a lungkiat, alipkhap huai amuat ding, akisia ding te hi,cih ahong hilhnopna ahi hi. Hih bangin Bawngbuk lim aki bawlna pen naungek Jesu in leitung nuntakna hong dam kiksak ding, hong puahpha ding, a kipat cil aa ahoihna hongpiang sakkik ding, cihna honglak hi.

Tuucing te
    Nuntakna nasep tuamtuam tawh a buai mahmah mitampi te tawh ki banglo in, tuucing te in na khempeuh te sangin a thupi penpen ahi, gupna thupha a mu masa pen te  hong suak hi. Pasian tapa mihing suahna adawn amuak te pen mi zawngdaipam te leh mi i nenniam te ahi uh hi. Tuucing te in naungek Jesu pen itna, lungdamna, zahtakna tawh a dawntuahna uh pen  mihing suahna hongla Pasian tapa aphatna uh hi pah hi.

Mizawng te leh mi nenniam athuak te
    Pasian itna akisam pen te ading leh amah alunggulh te adingin mihing suahna honglakna thu akilat nading in mizawngte leh nenniamna athuak mite, eite lak ah aom ahi hi. Mizawng te tungah piakkhiat hawmkhiatna leh kuamah pampaih deidanlo in sanggam ulenau abang leitung ahong hih theihna ding, bawng annek na kuangsung pan in aw nemno tawh athu gen in thubun mahmah hi.

Nisim nuntakna ah siangthona
    Tuucing te pan siiksek te dongin, mohbawl te pan music siam te dong, tui tawi nupi nu pan a kimawl naupang te dongin, amau te in nisim in a sepuh nate a lamdangtak leh a hoih pen in lungdamna tawh a sep a bawlna in nuntakna ah siangthona ahi hi, ci-in Pope Francis in gen hi.

Mary leh Joseph
    Mary in a tapa thu angaihsun den nu khat hi a, amah kiang ahawh khempeuh te tungah a tapa a lak hi. Tonu in atapa pen ama aading bek a aselcip Pasian nu hilo in mikhempeuh in a tapa thu mangin anuntakpih na dingun a zawn, nupi cingtak khat ahi hi. Misiangtho Joseph pen Tonu Mary kiang nai ah om in, naungek leh anu acing akem pa leh Pasian deihna banga anungta mi thuman ahi hi, ci-in Mary leh Joseph thu zong Pope in a gen hi.

Naungek Jesu
    Bawngbuk sungah naungek Jesu i lim i koihtak ciangin, Topa Jesu hongsuakna thu pen a picing pan ahi hi,ci-in Pope Francis in gen hi. A piang theilo ding thu khattawh a ki bat hangin aman thu mah ahi hi: Topa Jesu sungah Pasian pen naupangno khat bangin hong om a, kiniam khiatna tawh ama hong itna lian pen eite kiangah hong lak nuam ahih man in, a khut zak in mikhempeuh lungnuam maitaai tak hong dawntuah hi. Hih Bawngbuk i bawlna hangin leitung tangthu akikhel sak alamdang thupiang pen hong musak in hong tel sak hi. Tua ban ah, eite nuntakna zong bang ci bangin Pasian nuntakna tawh kizom hiam cihzong hong phawkkik sak hi.

Kumpi thumte
    Mipil thum te pawini hong tunciangin Bawngbuk sungah Mipil thum te (Kumpi thum te) zong i mu hi. Hih Bawngbuk sungah a mauteng lim aom na pen lungdamna thu tangko ding pen Christian khempeuh te i vaipuak ahi hi, ci-in a hong phawksak hi. Christu kiangah i tun nading lamsaupi tak i pai khading a, ahih hangin, i ciahkik ciangin Messiah tawh ki muhkhop lungdamna thu pen i hawmsawn ding hi. Tua pen minam dangte lak ah lungdamna thu aki zelhna kipatna ahih na thu, hih mipil thumte in honghilh uh hi.

Upna hawmsawn na
    I neulai in lungdam bawl kikhop na i kihel a, Bawngbuk mai ah i din hunzong i phawk kik hi. Hih bang phawk kikna i neihtheih mah bangin i tate zong hunkhat ciang eite mah bangin aphawk kiktheihna dingun  lamlak ding pen i vaipuak ahi hi. Hih Bawngbuk lim zepna hoihmaw hoihlo cih pen athupi masa hilo in, hih Bawngbuk in i nuntakna ah bangthu honggen hiam cih pen athupi ahi hi.
    Jesu suahna Bawngbuk i bawlna in upna lampi ah amanpha bek tham lo in, upna thu ah i kisapna te ahong lak hi. I neulai hun a kipan in, i nuntak hun sung in Topa Jesu thu lungngaih ding, Pasian hongitna teltheihna ding, Pasian pen eite tawh hong omkhopna leh eite pen amah tawh i om khopna thu i nuntakpih nading leh i upna dingin hong hilh ahi hi.

Translated by Fr.Paul Lian