Tonu'lungkham dahna nam(7)

September 15 ni pen “Tonu’lungkham dahna pawi” i bawl hi. tonu i lungkhamdahna te pen eite’lungkham dahna tawh ki bang lo hi cih thu pen hih pawi in hong phawk sak hi. Eite i lungkham dahna in leitung nuntakna ah ete ading mah sepna ah ih tuah khak haksatna te han ghi a, ahi zongin Tonu’lungkham dahna pen eite khempeuh hotkhiatna ngah theihna ding a Tapa’gimthuak na ah amahmah hong ki pia in eite adingin dahna hong thuak na ahi hi. Tonu’lungkham na tampi te lak pan  alian pen pen lungkham na nam 7 a om hi.

(1) Simeon in Topa Jesu’thu a gen kholhna (Lk 2:34-35)
    Simeon i thu gen na hangin Tonu’lungtang pen namsau hiam tawh a ki sun a bang hi. Hih thu te kum sawm thum sung bang ngaihsun in telzo lo ahihman in lungkhamna tawh Tonu a kidim hi. Ahi hangin Pasian deihna mah cih in Pasian tungah a ki ap tawntung hi. Ih nuntakna sungah lungkhamna ei ten ciat tek i nei hi. Lungkhamdahna in hong tuam in hong suk khak ciangin khiatna neilo in phunphun in lung patau in i om kei ding hi. Ih Topa  Jesu’gimthuakna leh Tonu i lungkham dahna te en gige le hang ih bawl zawh loh ih pelh zawh lo lungkhamna te ah thuakzawh na te i nei ding a, Pasian deihna ah ih ki ap zo ding hi.

(2) Egypt gam ah a taaina (Mt 2:13-14)
    Herod kumpipa in Betheleham khua ah kum 2 nuai siah naupang te a that hi. Hih thu in a tapa naungek Jesu a dingin a lauhuai mahmah thu hi, cih Tonu in a theih ciangin bang zahtakin lungkham ding ahi hiam. Bethelehem pen Egypt gam pen taai 300 bang ki gamla a, sehnel gam zong a ki nawk ahi hi. Sehnel gam, mual le guam, migilo leh ganhing gilo te tawh ki phukha thei ding cih thu pen naungek nei kum 15 kim apha pen Tonu leh Jeoseph te adingin dipkuat huai mahmah hi. A theih ngei loh mite leh u leh nau, sanggam om lohna Egypt gam ah bang ci nuntak mawk ding ahi hiam.
    Hih haksatna te khempeuh Tonu in a lungsim sungah pua in a thuak tentan zawhna pen Topa Jesu tawh a om khop man hi  hi. Eite zong ih nisim singlamteh te ih puakna zawh na dingin Topa Jesu ih lungtang sungah ih om sak kul hi. Tua hih leh in vangik te hong zangin tha thak te ih ngah ding hi.
   
(3) Biakinn pi sungah Topa Jesu aman suah na (Lk 2:41-46)
    Nithum khit ciangin Biakinn pi sungah mu kik pan uh hi. Misiangtho Alphonsus Liguori in, Topa Jesu aman suahna pen Tonu lungkhamdan te lak ah a lin pen pen ahi hi. A dang khempeuh te ah Topa Jesu a mah tawh om khawm ahih manin thuaknop a sa zaw hi, ci-in gen hi.
    Tonu mah bangin Topa ih zon ding ahi hi. Ih mawhna te leh ki cin lahna te hangin ih Topa  ih man suah leh ih muh kik dong ih zon ding ahi hi. Leitung ih vanzat te ih mansuah ciangin ih muh dong ih zong kik a, ahi hangin ih nuntakna sungah Topa ih man suah ciangin bang mah awlmawh lohna pen a dah huai mahmah ahi hi.

(4) Singlamteh apua Topa Jesu tawh Tonu Maria a ki muh na
    Meigon nu Tonu in a tapa Topa Jesu tungah lametna lianpa a nei ding hi. Tapa khatbek nei ahih manin amah a cing a khoi ding tapa muan huai khat a hih ding a deih mah ding ahi hi. Kum 30 aphak ciang in anu avak na ding nuntakna zong lo in, a nu kiang pan ki hem in thugen in a vai kawikawi na in a nu ading en khial na tampi leh lungkhamna tampi guan tuam ding hi. Tua bek tham lo in, a tapa thugen a za dah, aha za mi pawl khat i simmawhna leh gimpiakna a mu Tonu i lungtang bang zah in na ding ahi hiam.
    Hih ki muhna in Tonu adingin lainat na pi ahi hangin, a tapa Topa Jesu a dingin thangah na khat ahi hi. Topa Jesu in a gal te cilphih, zahkohna, satgawp na ah amah bek in thuak in, a singlamteh puakna ah Cyreneus a kidawn sak se hi. Tua in eite hotkhiatna ngahtheihna dingin Topa puak singlamteh bek ki cing lo in, ih singlamteh ciat ih puak ding ki sam a, ih singlamteh ciat puakna in ih Topa lungdam sak hi, ci-in misiangtho John Chrysotom in gen hi.

(5) Topa Jesu’sihna (Jn 19:30)
    Tonu penn a tapa kikhaina singlamteh phung ah a ding hi. Gamtat siatna hang a thahna a thuak tapa khat a ding na ngawn anu te in thuak lah pih mah mah ahih leh mawhnei lo pauban na a nei lo a tapa i sihna hangin Tonu lungkhamna bangzah tak in lian ding ahi hiam. A tapa a sih ciangin Tonu adingin leitungah a lametna khempeuh a bei siang ahi hi. Ahi hang in Topa Jesu in a ta dingin anunzuipa John apia hi. Eite in misiangtho John in sanggam te ih hi a, Tonu Maria pen eite’Nu hong hi ta hi. Topa Jesu a sihna hangin eite khempeuh pen Tonu i ta te i suah a, Pasian nu, Tonu Maria aw, ko mawhnei na ta te ading thu hong nget sak in ci-in  ama kiang i zuat ding ahi hi.
   

(6) Topa Jesu singlamteh tung pan a ki lakkhiatna (Jn 19:39-40)
    Galkap te khat in Topa’pangpi tei tawh sunkham in tui leh sihsan hong luangkhia hi. Topa’pangpi teipaak tawh ki sun a, ahi zongin natna athuak pen Tonu ahi hi, ci-in Misiangtho Alphosus in gen hi. A nuntakna sung tawntung a it, a khual  ahi a tapa pen tu-in nuntakna nei lo in, a angsung ah a tawi hi. Tate in nu le pa te a vui pen na a ki sak hangin a ngei na khat hi a, a tapa a vui ding anu a dingin bang zah tak in lainatna ling ding ahi hiam.

(7) Topa Jesu a vui na (Jn 19:40-42)
    Nicodemus leh Joseph of Arimathea te in Topa luanghawm pen han kuang thak khat sungah a vui uh hi. A gil sungah khu kua sung a paai a tapa pen tu-in  han kuang sung ah kisial in nuntakna a nei lo in a mu hi. Hih bang a tuah hangin Pasian tungah a upna in thuak zo sak in nunta zo sak hi. Vantungmi in Pasian kiang pan thu a zak sak lai in zong a tel loh pih mah in a san mah bangin, a tapa sihna leh kivui na zong Pasian’deihna in sang in Pasian tungah a ki ap zo lai ve ve hi. Lungkham na te i tuak khak ciangin ih tel zawh loh hangin Pasian deihna hi, ci-in i san ding ahi hi. Na khempeuh a thei leh a vanglian Pasian in amah a it  leh a muang te’adingin na khempeuh a hoih lam in a piang sak tawntung hi.
    Hih bang lungkham dahna te ah a tel zawh loh hangin themkhat beek Pasian a muan na kiap lo in a ki ap tawntung zawhna in Tonu i kiniam khiatna leh a tapa Topa Jesu tawh lungsim kikhat in aom tawntung na hang ahi hi. Hih thu te hangin Tonu pen Topa Jesu tawh mihing te’gupkhiat na ding na a hong sem Tonu hi a, amah hong cing hong kep na leh amah i thungetsakna nuai ah lungmuang tak in a tate ahi eite khempeuh ki ap ciat ding ahi hi. 

Vandaitui