ခရစ္စမတ်ရဲ့အနှစ်သာရ

၁။ခရစ္စမတ်(Christmas)ဆိုတာ အင်္ဂလိပ်စကားလုံး “Cristes Maesse” –the Mass of Christ- “ခရစ်တော်ရဲ့ယဇ်ပူဇော်ခြင်း”မ ှဆင်းသက်လာတာ ဖြစ်ပါတယ်။ ခရစ္စမတ်ဆိုတာ -Christ+Mass- ခရစ်တော်နဲ့မစ္ဆားတရားတော် နှစ်ခုပေါင်းပြီးထွက်ပေါ်လာတဲ့ စကားလုံးဖြစ်ပါတယ်။ ဒါ့ကြောင့်ခရစ္စမတ်ဆိုတာ ခရစ်တော်မွေးဖွားတဲ့ညမှာ ပြုလုပ်တဲ့မစ္ဆားတရားတော်ကို အစွဲပြုသုံးနှုန်းတဲ့ စကားလုံးဖြစ်တယ်။ ခရစ်တော်ရဲ့မွေးနေ့ပွဲကို ဂုဏ်ပြုကျင်းပတဲ့အခါမှာ မစ္ဆားတရားတော်ဟာ မပါမဖြစ်ပါရမယ့် ဝတ်ပြုကိုးကွယ်ခြင်း ဖြစ်တယ်။ ဒါ့ကြောင့် မစ္ဆားမပါဘဲ ခရစ်တော်မွေးနေ့ကျင်းပတာဟာ ပြည့်စုံခြင်း မရှိပါဘူး။

    မစ္ဆားမပါတဲ့ခရစ္စမတ်ပွဲတော်ဟာလည်း အတုအယောင်ခရစ္စမတ်၊ ဗန်းပြခရစ္စမတ်၊ အပေါ်ယံခရစ္စမတ် (ခရစ္စမတ်အခွံ)၊ အနှစ်သာရမရှိတဲ့ ခရစ္စမတ်ပဲဖြစ်ပါတယ်။ ဘယ်လောက်ပဲ ခရစ်တော်မွေးနေ့ ဂုဏ်ပြုသီချင်းတွေ၊ ကယ်ရယ်သီချင်းတွေ၊ အာလေလုယာသီချင်းတွေ သံကုန်ဟစ်၊ ပျော်မြူးကခုန်နေကြပေမယ့် ဝတ်ပြုကိုးကွယ်ခြင်းဖြစ်တဲ့ မစ္ဆားတရားတော်မပါဘူးဆိုရင် ခရစ္စမတ်လို့ ခေါ်လို့မရပါဘူး။ ဒါ့ကြောင့် ဒီကနေ့မစ္ဆားဝတ်ပြုခြင်းမှာ မပါဝင်ကြတဲ့ပုဂ္ဂိုလ်တွေအတွက် ခရစ်တော်မွေးနေ့ဟာ ပျော်ပွဲရွှင်ပွဲတစ်ခုသာ ဖြစ်ပါတယ်။ ခရစ္စမတ်ည၊ခရစ္စမတ်ပွဲတော်လို့ ခေါ်လို့မရပါဘူး။ ဝတ်ပြုကိုးကွယ်ခြင်းဖြစ်တဲ့ မစ္ဆားတရားမပါဘူးဆိုရင် ခရစ်တော်-ခရိ (Christ-Chris)ပဲ ဖြစ်ပါတယ်။ Mass မပါဘူး ဖြစ်သွားလိမ့်မယ်။ ဒါ့ကြောင့် သခင်ယေဇူးမွေးတဲ့နေ့မှာ ပြုလုပ်ကျင်းပတဲ့ဝတ်ပြုကိုးကွယ်ခြင်း မစ္ဆားတရားတော်ကို ခရစ္စမတ်လို့ခေါ်တာ ဖြစ်ပါတယ်။ ခရစ္စမတ်ရက်မှာ ကျောင်းထိုင်းဘုန်းကြီးမရှိတဲ့ နယ်စွန်းနယ်ဖျားဒေသက ဘာသာတူတွေ မစ္ဆားမနာရတဲ့သူတွေ ရှိပါတယ်။ ဒါ့ကြောင့် ခရစ္စမတ်ရက်မြတ်နေ့မှသည် မင်းသုံးပါပွဲမတိုင်ခင်ထိ ခရစ္စမတ်ကာလအတွင်း ဘာသာတူများ မစ္ဆားတရားနာယူနိုင်အောင်လို့ ကျောင်းထိုင်ဘုန်းကြီးများအနေနဲ့ ကြိုးစားပြီးစီရင်စုအတွင်းမှာ နယ်လှည့်ပြီး ခရစ္စမတ်ကောင်းကြီးကို သွားရောက်ဝေငှကြတာ ဖြစ်တယ်။



၂။ယေဇူးခရစ်တော်က ငါရဲ့မွေးနေ့ပွဲကို ပြုလုပ်ကျင်းပပေးကြပါလို့ တောင်းဆိုခဲ့တာ မဟုတ်ပါဘူး။ ကျမ်းစာအုပ်ထဲမှာ မပါတဲ့အရာ၊ မရှိတဲ့အရာကို ဘယ်သူကမှ မယုံကြည်ရဘူးလို့ ဂိုဏ်းကွဲခရစ်ယာန်တွေက ဆိုကြပါတယ်။ ကျမ်းစာအုပ်ထဲမှာ ခရစ္စမတ်ပွဲတော် ကျင်းပကြပါလို့ ရေးထားတာတွေ့မိပါသလား။ ဒီအနီးနာ၊ဒီပတ်ဝန်းကျင်မှာ ခရစ္စမတ်ပွဲနေ့တွေမှာ သီချင်းဆိုကြ၊အော်ကြ၊ ဟစ်ကြနဲ့ပျော်နေကြတာ၊ ပျော်ပွဲရွှင်ပွဲတွေ ကျင်းပနေကြတဲ့သူတွေ အများကြီးရှိပါတယ်။ ကျွန်တော်တို့ ကက်သလစ်တွေထက် ပိုပြီးတော့တောင် ကြီးကျယ်ခမ်းနားအောင်၊ အံ့မခန့်အောင် စီစဉ်ကျင်းပနေကြတဲ့သူတွေ ဒီပတ်ဝန်းကျင်မှာ ရှိနေပါတယ်။

ကျမ်းစာထဲမှာ ခရစ္စမတ်ပွဲတော်ကျင်းပကြပါလို့ ရေးထားတာမရှိဘူး၊ သွန်သင်တာမရှိဘူး၊ သင်ကြားတာမရှိပါဘူး။ ကျမ်းစာကပွဲတော် ကျင်းပဖို့ မသွန်သင်ပါဘူး။ ဒါဆိုရင် ဘယ်သူက သွန်သင်တာလဲ။ ဘယ်သူက ပွဲတော်ကျင်းပစေတာလဲ။ ကက်သလစ်အသင်းတော်ကပဲ သွန်သင်တာ ဖြစ်ပါတယ်။ ကျင်းပစေတာ ဖြစ်ပါတယ်။

ပုပ်ရဟန်းမင်းကြီးအရှင်သူမြတ် Pope Liberius(AD 352-366)က ခရစ္စမတ်ပွဲတော်ကို ကမ္ဘာတစ်ဝှမ်းမှာရှိတဲ့ ဘာသာဝင်တွေအားလုံး ကျင်းပဖို့ ထုတ်ပြန်ကြေငြာခဲ့ပါတယ်။ အဲဒီအချိန်တုန်းက ဂိုဏ်းကွဲခရစ်ယာန်ဆိုတာ တစ်ဦးတစ်ယောက်မှ မရှိပါဘူး။ ပုပ်ရဟန်းမင်းကြီးရဲ့ ထုတ်ပြန်ကြေငြာချက်အပြီးမှာတော့ ခရစ္စမတ်ပွဲတော်ကို ကမ္ဘာတစ်ဝှမ်းမှာ နှစ်စဉ်ကျင်းပလာကြတာ ဖြစ်တယ်။ ဒါပေမယ့် ရောမအင်ပါယာကို ကမ္ဘာကို လွှမ်းမိုးတဲ့အချိန်ဖြစ်တဲ့အတွက် နေရာဒေသအလိုက် နှစ်သက်ရာ၊ အဆင်ပြေရာ နေ့ရက်အသီးသီးမှာ ကျင်းပပြုလုပ်ကြပါတယ်။ နွေဦးမှာ ကျင်းပတဲ့သူတွေရှိသလို၊ ဆောင်းတွင်းမှာကျင်းပတဲ့သူလည်း ရှိပါတယ်။ မိမိတို့ရဲ့နေရာဒေသအလိုက် ပြုလုပ်ကျင်းပကြတာ ဖြစ်တယ်။

အဲဒီအချိန်အခါမှာ ရောမအင်ပါယာ လက်အောက်ခံဒေသ အနှံ့အပြားမှာ ရောမတို့ကိုးကွယ်တဲ့ နတ်ဘုရားတွေ အများအပြားရှိပါတယ်။ သူတို့ဟာ ဒီဇင်ဘာ၂၅ရက်နေ့ကို နေနတ်ဘုရားပွဲအဖြစ် သတ်မှတ်ပြီးနေဘုရားပွဲ ကျင်းပပြုလုပ်ကြပါတယ်။ အဲဒီနေ့ဟာနှစ်တစ်နှစ်ရဲ့ နေ့တာအရှည်ဆုံးနေ့အဖြစ် မှတ်ယူကြလို့ပဲ ဖြစ်ပါတယ်။ ဒါ့ကြောင့် ရောမအင်ပါယာတစ်ဝှမ်းမှာ ဒီဇင်ဘာ၂၅ရက်နေ့ကို နေဘုရားနေ့အဖြစ် နှစ်စဉ်နှစ်တိုင်းပွဲတော် ကျင်းပကြပါတယ်။

ရောမအင်ပါယာအတွင်းမှာ ရှိတဲ့လူမျိုးအသီးသီးဟာ ခရစ်ယာန်တရားတော်ကို ကြားသိလက်ခံ ယုံကြည်လာကြတဲ့အခါမှာ ရောမတို့ရဲ့နတ်ဘုရား၊ လောကဘုရား ကိုးကွယ်ယုံကြည်မှုတွေဟာ တဖြည်းဖြည်းနဲ့ ဆိတ်သုဉ်းလာပါတယ်။ ခရစ်ယာန်တရားတော် ထွန်းကားလာတဲ့အခါမှာ အဲဒီနေဘုရားပွဲတော် ကျင်းပတဲ့ဒီဇင်ဘာ၂၅ရက်နေ့ကို ခရစ္စမတ်ပွဲတော်အဖြစ် ကျင်းပဖို့ပုပ်ရဟန်းမင်းကြီးက ကြေငြာထုတ်ပြန်ခဲ့ပါတယ်။ ဘာဖြစ်လို့လဲဆိုတော့ ခရစ်တော်ဟာ လောကရဲ့အလင်း၊ လောကကိုထွန်းလင်းစေသူ(Lumen Christi)၊ အမှောင်ကမ္ဘာကို အလင်းဆောင်သူ၊ တရားမျှတခြင်းရဲ့ရောင်ခြည်တော်(Sun of Justice)၊ အပြစ်ကျွန်ဘဝမှ ကယ်နှုတ်သူဖြစ်တဲ့အတွက် ခရစ်တော်ရဲ့မွေးနေ့အဖြစ် သတ်မှတ်ထုတ်ပြန်ခဲ့တာ ဖြစ်ပါတယ်။ အဲဒီအချိန်ကစပြီး ဒီဇင်ဘာ၂၅ရက်နေ့မှာ နှစ်စဉ်နှစ်တိုင်း ကမ္ဘာတဝှမ်းလုံးမှာ ကျင်းပကြတဲ့ခရစ္စမတ်ပွဲတော်ကြီး ဖြစ်တည်လာတာ ဖြစ်ပါတယ်။

ဒါ့ကြောင့် ခရစ္စမတ်ပွဲတော်ကို ဘုရားကပြုလုပ်ကျင်းပစေတာ မဟုတ်သလို၊ ကျမ်းစာထဲမှာပါလို့ ပြုလုပ်ရခြင်းလည်း မဟုတ်ပါဘူး။ ကက်သလစ်အသင်းတော်က သတ်မှတ်ပြဋ္ဌာန်းပေးလိုက်လို့ စတင်ကျင်းပလာရခြင်း ဖြစ်ပါတယ်။ ဒါ့ကြောင့် ခရစ္စမတ်ပွဲတော်ဆိုတာ ဒီဇင်ဘာ၂၅ရက်နေ့၊ ခရစ္စမတ်ပွဲနေ့မှာ ကက်သလစ်တွေပြုလုပ်တဲ့ မစ္ဆားတရားဝတ်ပြုကိုးကွယ်ခြင်းကို ဆိုလိုခြင်း ဖြစ်ပါတယ်။ ဒါ့ကြောင့် ဒီကနေ့ ခရစ္စမတ်နေ့၊ ခရစ်တောယေဇူးရဲ့ မွေးနေ့မှာ ဝတ်ပြုကိုးကွယ်ခြင်းဖြစ်တဲ့ မစ္ဆားတရားတော်မှာ  ပါဝင်ခွင့်ရကြတဲ့ ကျွန်တော်တို့တတွေဟာ ကျေးဇူးတော်အထူးခံစားရတဲ့ သူတွေပဲဖြစ်တယ်။ ခရစ္စမတ်ရဲ့အနှစ်သာရကို ပြည့်ပြည့်ဝဝခံစားကြရတဲ့သူတွေပဲ ဖြစ်ပါတယ်။

၃။ခရစ္စမတ်အချိန်အခါမှာ ကျွန်တော်တို့ဟာ ဘုရားကျောင်းကို အမျိုးမျိုးဆင်ယင် ခြယ်သကြတယ်။ နွားစားခွက်တွေ ပြုလုပ်ကြတယ်။ အဲဒီမှာတစ်ချို့နေရာတွေမှာ ဆန်းတာကလော့စ် (Sancta Claus) ပုံတွေတွေ့ရမှာ ဖြစ်တယ်။ ခရစ္စမတ်ကဒ်တွေပေါ်မှာလည်း တွေ့ရမှာဖြစ်တယ်။ အဲဒီဆန်းတာကလော့စ်(Sancta Claus) ကို ခရစ္စမတ်ဘိုဘိုလို့လည်း ခေါ်ကြပါတယ်။ အဲဒီအဘိုးကြီးဟာ ဦးထုပ်အနီကို ဆောင်းထားပြီး မုတ်ဆိတ်မွှေး၊ ပါးသိုင်းမွှေးတွေ၊ ဆံပင်တွေဟာ ဖြူဖြူဖွေးဖွေးနဲ့အိုးမင်းနေတဲ့ သူတစ်ယောက် ဖြစ်ပါတယ်။ အဲဒီဆန်းတာကလော့စ် (Sancta Claus)ဆိုတဲ့ သူဟာတစ်ခြားသူမဟုတ်ဘဲ ရဟန္တာနီးကော့လပ်စ် (St.Nicholas)ပဲ ဖြစ်ပါတယ်။

ရှေးခေတ် အနောက်နိုင်ငံ နေရာဒေသတစ်ချို့မှာ မိန်းကလေးတွေဟာ ငွေကြေး၊အသပြာမရှိ၊ ဥစ္စာဓနမရှိရင် အိမ်ထောင်ပြုလို့ မရပါဘူး။ တရားဝင်လက်ထပ် ထိမ်းမြားဖို့မလွယ်ပါဘူး။ ကျွန်တော်တို့ရဲ့ ရိုးရာဓလေ့ကတော့ သတို့သားဘက်က သတို့သမီးကိုငွေကြေး၊အသပြာ၊ ဥစ္စာဓန၊တိရစ္ဆာန်တွေနဲ့ တင်တောင်း၊ဝယ်ယူကြရပါတယ်။ ဒါပေမယ့် သူတို့ကတော့ Dowry လို့ခေါ်တဲ့ သတို့သမီးဘက်က သတို့သားကိုငွေကြေး၊ အသပြာ၊ဥစ္စာဓန၊ တိရစ္ဆာန်တွေနဲ့တင်တောင်း၊ ဝယ်ယူရပါတယ်။ မိန်းကလေးက အိမ်ထောင်ပြုမယ်ဆိုရင် ယောင်္ကျားကိုဝယ်ယူ၊ တင်တောင်းရတဲ့သဘော ဖြစ်ပါတယ်။ မိန်းကလေးဘက်က ငွေကြေး၊အသပြာ၊ ဥစ္စာဓန၊တိရစ္ဆာန်တွေ မသွင်းနိုင်ဘူး၊မပေးနိုင်ဘူးဆိုရင် ယောင်္ကျားမရ၊ အိမ်ထောင်မရှိဘဲ၊ အရိုးထုတ်ဖို့ပဲ
ဖြစ်ပါတယ်။ ဒါ့ကြောင့် သမီးအများကြီးမွေးတဲ့မိဘတွေဟာ အင်မတန်မှ ခေါင်းခဲရတယ်၊ မျက်နှာငယ်ရပါတယ်။


တစ်ချိန်တုန်းကသမီး(၃)ယောက် မွေးထားတဲ့လင်မယားနှစ်ဦး ရှိပါတယ်။ သူတို့ဟာ အင်မတန်မှ ဆင်းရဲတဲ့မိသားစု ဖြစ်ပါတယ်။ သမီးပျို(၃)ဦး ရှိနေပြီ အိမ်ထောင်ဘက် မစီစဉ်ပေးနိုင်တော့ မိဘနှစ်ပါးဟာ စိတ်အားငယ်ပြီး ဝမ်းနည်းနေကြရတယ်။ သမီးတွေကလည်း အိမ်ထောင်ပြုချင်နေကြပြီ ဖြစ်တယ်။ ဆင်းရဲတယ်ဆိုတော့ Dowry ပေးဖို့ငွေကြေး မတတ်နိုင်ကြဘူး။ ဒါ့ကြောင့် အိမ်ထောင်မပြုနိုင်ပဲ နေနေကြရတယ်။ ဒီလိုအချိန်မှာ မိဘနှစ်ပါးရဲ့ ဦးဆောင်မှုနဲ့ မိသားစုအတူတကွ ဘုရားစင်ရှေ့မှာ ညတိုင်းဆုတောင်း ကြတယ်။ ဒီအကြောင်းကို သူတို့ရဲ့ကျောင်းထိုင်ဘုန်းကြီး ဖာဿရ်နီကော့လပ်စ်က ကြားသိရတယ်။ ဒါနဲ့ဖာဿရ်နီကော့လပ်စ်လည်း သူရတဲ့အလှူငွေတွေကို စုပြီးသူတို့ကို ပေးဖို့ကြိုးစားတယ်။ ခါတိုင်းလိုပဲ ညမှာအတူ ဆုတောင်းနေကြတဲ့အချိန်မှာ သူတို့ရဲ့အိမ်ပြတင်းပေါက်ကနေ အိမ်ထဲကို ငွေထုပ်ကို ပစ်လွှတ်လိုက်တယ်။ ဘယ်သူလာထားမှန်းမသိပေမယ့် အဲဒီငွေနဲ့သမီးအကြီး၊ သမီးအလတ်တို့ဟာ အိမ်ထောင်ပြုနိုင်ကြပြီး ဖြစ်တယ်။ သမီးငယ်အလှည့်ကျတဲ့အချိန်မှာ ဖခင်ဖြစ်သူက စဉ်းစားလာတယ်။ ဘယ်သူလာထားတယ်ဆိုတာ သိချင်တယ်ဆိုပြီး တိတ်တဆိတ်စောင့်ကြည့်ဖို့ ဆုံးဖြတ်လိုက်တယ်။ တစ်နေ့မှာတော့ သူတို့မိသားစုအတူ ဆုတောင်းနေကြတဲ့အချိန်မှာ အမှောင်ထဲကနေ လူတစ်ယောက်ကုတ်ကုတ်ပေါ်လာပြီး အိမ်ထဲကို အထုပ်ကြီးတစ်ထုပ် ပစ်လွှတ်လိုက်တယ်။ ဒါနဲ့ဘေးတစ်နေရာမှာ တိတ်တဆိတ် ထိုင်စောင့်နေတဲ့ ဖခင်ဖြစ်သူက အဲဒီအထုပ် ပစ်လွှတ်လိုက်တဲ့သူကို ဓာတ်မီနဲ့ထိုးကြည့်လိုက် တယ်။ အဲဒီချိန်မှပဲ အဲဒီငွေထုပ် ပစ်လွှတ်ပေးနေတဲ့သူဟာ အခြားသူမဟုတ်ဘဲ သူတို့ရဲ့ကျောင်းထိုင်ဘုန်းကြီး ဖြစ်မှန်းသိလိုက်ရတယ်။ အဲဒီနောက် အဲဒီသမီးပျို(၃)ဦးစလုံး အိမ်ထောင်ကျပြီးတဲ့နောက်မှာ ဒီအကြောင်း၊ ဒီသတင်းဟာ ပျံ့နှံ့သွားပြီးတော့ Sancta Claus ဆိုပြီး ကျွန်တော်တို့ နှုတ်ကျိုနေတဲ့ နာမည်တစ်ခု ပေါ်ထွက်လာတာ ဖြစ်ပါတယ်။

ဒါနဲ့ဘာဖြစ်လို့ ခရစ္စမတ်နဲ့ ဒီဆန်းတာကလော့စ်က တွဲပြီးပါပါလာ ရသလဲ။ ခရစ္စမတ်ပွဲတော် ကျင်းပတဲ့အချိန်မှာ အဘိုးကြီးတစ်ယောက်၊ ဗိုက်ကြီးစူစူ၊ ဆံပင်ကဖြူဖြူ၊ မုတ်ဆိတ်မွှေး၊ ပါးသိုင်းမွှေးက ဖြူဖြူ၊ထိပ်ချွန်းနေတဲ့ အနီရောင်ဦးထုပ်ဆောင်ထားတဲ့ ဆန်းတာကလော့စ်ကို အမြဲတွေ့နေရပါတယ်။ ချစ်ခြင်းမေတ္တာမျှဝေခြင်း အမှတ်သင်္ကေတတစ်ခုကို ဖော်ဆောင်ပေးတယ်ဆိုတာ သိရပါတယ်။

ခရစ္စမတ်ဆိုတာ ချစ်ခြင်းဖလှယ်တဲ့ပွဲ ဖြစ်တယ်။ ခွင့်လွှတ်ခြင်း၊ စာနာနားလည်းခြင်း၊ ပေးကမ်းခြင်းတွေနဲ့အတူ ပျော်ရွှင်ခြင်း၊ငြိပ်သက်ခြင်း၊ ချစ်ခြင်းတွေ ဖလှယ်ကြရတဲ့ပွဲ ဖြစ်တယ်။ ဘုရားကိုယ်တော်တိုင် ကျွန်တော်တို့ကို ချစ်လို့၊ချစ်ခြင်းမျှဝေပေးဖို့ ကောင်းကင်ဘုံကို စွန့်ထားခဲ့ပြီး လူ့ပြည်မှာ သင်နဲ့ကျွန်ုပ်ဆီမှာ အလည်အပတ် ကြွရောက်လာတာ ဖြစ်ပါတယ်။

စဉ်းစားကြည့်ပါ။ သင်ကိုချစ်လို့၊ ခင်လို့ သင့်ဆီ လာလည်တဲ့ဧည့်သည်ကို အရေးမစိုက်၊မကြိုဆို၊ ဧည့်ဝတ်ကျေခြင်းမရှိ၊ ဂရုမစိုက်ဘဲနေမယ်ဆိုရင် သင်ဟာ မိုက်မဲတဲ့သူ၊ အသုံးမကျတဲ့သူ ဖြစ်မှာပါ။ ဒါဆိုရင် ဘုရားသခင် သင့်ဆီမှာ ကြွလာမှာကို သင်က မဆီးကြိုဘူးလား။ ဘုရားက သင့်ဆီကို ကြွလာတာဟာ အပျင်းဖြေ ကြွလာတာ မဟုတ်ဘူး။ ငွေထုပ်ကြီး၊ ပစ္စည်းဥစ္စာတွေ ပေးဖို့ကြွလာတာ မဟုတ်ဘူး။ အဲဒါထက် တန်ဖိုးရှိတဲ့ချစ်ခြင်းမေတ္တာ ပေးဖို့ကြွလာတာ ဖြစ်တယ်။ ခရစ္စမတ်ဆိုတာ ချစ်ခြင်းကို အခြေခံတဲ့ပွဲတော် ဖြစ်တဲ့အတွက် ချစ်ခြင်းကို ဖလှယ်ကြရမှာ ဖြစ်တယ်။

အရင်တုန်းက ငါတို့ဟာ အချင်းချင်းရန်ဖြစ်တဲ့သူတွေ၊ ရန်ငြိုးထားတဲ့သူတွေ၊ ဖြစ်ခဲ့ကြတယ်။ ဒါပေမယ့် ခရစ်တော်ကြောင့် ငါတို့ဟာ လူကောင်းတွေ ဖြစ်လာကြရတယ်။ ဘုရားကို ယုံကြည်ကိုးစားလို့ လူကောင်းတွေ၊ တစ်ဦးကိုတစ်ဦး ချစ်ချစ်ခင်ခင် ပေါင်းသင်းမိတ်ဖွဲ့ လာကြတယ်။ သွေးသားအားဖြင့် ညီအစ်ကိုမောင်နှမတွေ မဟုတ်ပေမယ့် ခရစ်တော်အားဖြင့် ချစ်ခင်ရင်နှီးတဲ့သူတွေ၊ ညီအကိုမောင်နှမတွေ ဖြစ်လာကြရတယ်လို့ သံပေါလုက ဆိုထားပါတယ်။ ဒါကြောင့် ရန်ငြိုးတွေ မထားပါနဲ့တော့။ လင်မယားရန်ဖြစ်တဲ့သူတွေလည်း ရန်မဖြစ်ကြပါတော့နဲ့။ မုန်းတီးခြင်းတွေကို ဆုပ်ကိုင်မထား ပါနဲ့တော့။ ခွင့်လွှတ်ကြပါတော့။ ခရစ်တော်ဘုရားကို လူ့အဖြစ်ယူပြီး ကျွန်တော်တို့ ကြွလာပါပြီ။ သင့်ကို ကူညီမယ့်သူ ရောက်လာပြီ။ သင့်ဘက်မှာ ရပ်တည်ပေးမယ့်သူ၊ သင့်ရဲ့ပြဿနာ၊ အခက်အခဲတွေကို ဖြေရှင်းပေးမယ့်သူ ရောက်လာပါပြီ။ ဒီကနေ့ည ဒီအကြောင်းကို လက်ခံယုံကြည်ဖို့ အရေးကြီးပါတယ်။

၄။သိုးထိန်းတွေဆိုတာ ဂျူးလူမျိုးတွေကြားထဲမှာဆိုရင် အဆင့်မရှိ၊ ဂုဏ်သိက္ခာမရှိ၊ အနိမ့်ကျဆုံးလူသားတွေလို့ သတ်မှတ်ခံကြရတဲ့သူတွေ ဖြစ်တယ်။ သူတို့ဟာ ဆင်းရဲတယ်။ အနိမ့်ခံရတယ်။ သူတို့ကို အသိုင်းအဝိုင်းက ပစ်ပယ်ထားကြတယ်။ သူတို့ဟာ ဘာမှမလုပ်တတ်။ မလုပ်နိုင်ဘူး။ သူများရဲ့သူတွေကို ထိန်းကျောင်းပေးရတယ်။ သိုးထိန်းရာက ရတဲ့လုပ်အားခနဲ့ မလောက်မင စားသောက်ကြရတယ်။ ဒါ့ကြောင့် သိုးထိန်းရင်းနဲ့ တွေ့ကရတွေ ယူကြတာ၊စားကြတယ်။ ဒါ့ကြောင့် သူခိုးတွေလို့ အပြောခံရတယ်။ သူခိုးအများစုဟာလည်း သိုးထိန်းခြင်းနဲ့ အသက်မွေးတဲ့သူတွေ ဖြစ်နေတယ်။ ရွာထဲဝင်ရင်း တွေ့ရာဝထ္တုပစ္စည်းတစ်ခုခုကို ပိုင်ရှင်မသိအောင် ယူတတ်ကြတယ်။ ဒါ့ကြောင့် သူတို့ကို ရွာထဲမှာ မကြိုက်ကြတော့၊ ရွာအပြင်မှာပဲ နေရကြတယ်။ ဆိတ်တွေ၊သိုးတွေကို ထိန်းကျောင်းဖို့ ရွာအပြင်ပဲ အိပ်ကြရတယ်။

ဂျူးအသိုင်းအဝိုင်းထဲမှာ ဝင်မဆံ့တဲ့သူတွေ၊ ပစ်ပယ်ခြင်းခံရတဲ့သူတွေ၊ လူလို့တောင်အထင်မခံရတဲ့သူတွေ ဖြစ်တဲ့အနိမ့်ကျဆုံးလူသားတွေ၊ သိုးထိန်းတွေဆီမှာ ကောင်းကင်တမန် ထင်ရှားပြခဲ့တယ်။ ကယ်တင်ရှင်မွေးဖွားတဲ့ သတင်းကောင်းကို ဦးစွာကြားသိရခဲ့တယ်။ သူငယ်တော်ယေဇူးကို အရင်ဆုံး ဖူးတွေ့ခွင့်ရခဲ့ကြတယ်။

ကောင်းကင်တမန်တော်က ဆိုပါတယ်။ သင်တို့အားမငယ်ကြနဲ့၊ ဝမ်းမနည်းကြနဲ့။ ဂျူးလူမျိုးလူကုံထုံတွေ၊ သူဋ္ဌေးသူကြွယ်တွေ၊ မင်းညီမင်းသားတွေ၊ ပညာရှိတွေ၊ ကျမ်းတတ်ဆရာတွေ၊ ရဟန်းတွေက သင်တို့ကို စွန့်ပစ်ထား၊ ဘေးဖယ်ထားပြီး အထင်သေးခံရပေမယ့် အားမငယ်နဲ့။ မကြောက်ကြနဲ့။ သင်တို့ကို - ဝမ်းနည်းတဲ့သူတွေ၊ စိတ်ပျက်အားငယ်တဲ့သူတွေ၊ အနိမ့်ခံ၊အစွန့်ပစ်ခံသူတွေ၊ အင်အားချိနဲ့တဲ့သူတွေ- သင်တို့ကို ကယ်တင်ဖို့ မက်ဆီယားသခင် ယနေ့ဖွားမြင်ပြီလို့ သတင်းစကားပါး ခဲ့ပါတယ်။ သိုးထိန်းတွေလဲ အံ့သြလို့မဆုံး၊ဝမ်းသာလို့ မဆုံး၊ ရင်ထဲက စီးကျလာတဲ့ ပျော်ရွှင်ဝမ်းမြောက်ခြင်းတွေနဲ့အတူ ဂလောရီယား(Gloria) သီချင်းကို သီဆိုချီးမွမ်းကြပါတယ်။

လောကမှာ လိုချင်တာမရ၊ ရတာမလိုဖြစ်ပြီး ရည်မှန်းချက်ပန်းတိုင်ကို အရောက်သွားဖို့ ခက်ခဲလှပါတယ်။ ပြည့်စုံတယ်လို့ မရှိတဲ့ဒီလောကမှာ ကျွန်တော်တို့အားလုံးဟာ ဝမ်းနည်းမှု၊အားငယ်မှု၊ စိုးရိမ်ပူပန်မှု၊ အခက်အခဲပြဿနာအမျိုးမျိုး ပိုင်ဆိုင်တဲ့သူတွေ ဖြစ်ကြပါတယ်။ ဒီ့အပြင် ဝမ်းသာပါတယ်၊ အောင်မြင်ပါတယ်ဆိုတဲ့ အရာတွေထဲမှာတောင် ကျွန်တော်တို့ဟာ လိုချင်တာတွေ၊ ထပ်ပြီးရယူလိုမှုတွေ ရှိနေဆဲဖြစ်ကြတဲ့ လောကသားတွေ ဖြစ်ကြပါတယ်။ ဒါ့ကြောင့် အဲဒီပူပန်ကြောင့်ကြမှု၊ လောဘရမ္မက် အမျိုးမျိုးတွေကြားကနေ လွတ်မြောက်နိုင်ဖို့၊ အခက်အခဲတွေ၊ ပူဆွေးသောကအဖုံဖုံတွေကနေ ကျွတ်လွတ်ဖို့၊ ရန်ငြိုးရန်စတွေ ပြေငြိမ်းပြီး ချစ်ခြင်းမေတ္တာတွေနဲ့ ဘဝခရီးကို လျှောက်လှမ်းနိုင်ဖို့ သင်နဲ့ကျွန်ုပ်အတွက် ခရစ်တော် လူ့အဖြစ်ယူပြီး ကြွရောက်လာပါပြီ။ ပျော်ရွှင်ဝမ်းမြောက်ခြင်းတွေနဲ့ လက်ခံယုံကြည်ပြီး ဆီးကြိုကြပါစို့။

မွေးဖွားလာတဲ့ သူငယ်တော်ယေဇူးဘုရားက သင်တို့အပေါ်သို့ ချစ်ခြင်း၊ငြိမ်းချမ်းခြင်း၊ ပျော်ရွှင်ခြင်းကောင်းကြီးမင်္ဂလာတော်ကို သွန်းလောင်းချ ပေးတော်မူပါစေ။ အာမင်။

မှတ်ချက်။။၂၀၁၄ခုနှစ်၊ ခရစ္စမတ်သံခေါင်းမစ္ဆား၌ Fr.Robert Kam Hau(Sts.Peter&Paul Chruch, Kalay) တီးတိန်ချင်းဘာသာစကားဖြင့် ဟောကြားသောသြဝါဒမှ ကောက်နှုတ်၍ ဆီလျော်အောင်ပြန်ဆိုထားခြင်း ဖြစ်ပါသည်။

တောင်ကတုံး(နှင်းပွင့်)