TOPA JESU IN
PIANPIH LAIGUIZOM SANGGAM DANG ANEI HIAM ? (1)

Mt 13:55-36; Mk 6:3
"Khutsiampa’ tapa hilel hilo ahi hiam? A nu zong Mary (Maria) a kici nu hi lel hilo ahi hiam? A sanggam James, Josef, Simon leh Judas hilo ahi uh hiam? A sanggam numeite zong hilai mahah om hilo ahi uh hiam? Tua bang hina pi-in hih mipa in koi lai panin hih bang thu teng ngah thei ahi hiam? a ci uh hi."

Hih Laisiangtho mun bulphuhin, mipawlkhatte in Topa Jesu in painpih laiguizom nukhat pakhat sung pan piang sanggam dang nei hi, ci-in genbelhin nei thei uh hi.

Christian kipatcil pan kipanin Christian pawlpi a kici khempeuh in Jesu in sanggam laiguizom nei lo hi cih thu na lenkip uh hi. Hih thu pen Catholic Christiante bek hi loin, Anglican, Assyrian Church, Eastern Orthodox Church, Oriental Orthodox Church leh, Martin Luther, Hul-drych Zwingli, John Calvin leh John Wesley (18th Cen-tury Methodist Church aphuan pa), cihte khempeuh in Catholic Christiante tawh a kibangin, Topa Jesu i Nu Maria (Mary) in tanu tapa dang nei loin, ta masa leh ta khatbek ahi,  Jesu bek nei a hihna thu na lenkip uhhi.

Topa Jesu in sanggam dang nei maw neilo cih thu Laisiangtho sung a kigelh thute tawm i ending hi. Tua i etma-in, “Ta masa” cih kammal a tomin theih ding a thupi khat ahi hi. Mipawl khatte in, Topa Jesu pen Laisiangtho sungah “Ta masa” (first born son) ci ahih manin, sanggam dang nei keileh cikmahin “Ta masa” ci ngei lo ding hi, ci-in Topa Jesu in pian pih laiguizom sanggam dang nei hi cih thu kipsakna in gen thei uh hi.
Laisiangtho sungah ta masa (First born son) cih in khiatna nih nei tawntung ahihna phawk ding a thupi mahmah khat ahi hi. Khatna ah, a nugil a hong masa, tacil cihna ahi hi. A nihna ah, a pa aana leh thu neihna khempeuh a luahpa cihna ahi hi. Hih thute pen Piancil 25:21-26 – Jacob leh Esau tangthu, Piancil 48:13-22 Ephraim leh Manasseh tangthu, Piancil 35:22; 49:3-4–Reuben pen Jacob tapa upa pen, ta masa-tacil hina pi in,  amawhna hangin, tacil za, ta masa cih pan a kihepkhiatna thute ah siang takin kimu thei hi.

Topa Jesu pen Lai siangtho sungah “Tacil” ahih keileh “Ta masa” ci in na kigelh hi. Tua “Ta cil”, “Ta masa” cihpen pawl-khatte in anu Maria sung pan apiang masa ta masa cihna bekin ngaihsun khial uh hi. Ahi zongin, Paul in Colosae 1:13-23 na sungah Topa Jesu pen bang hangin “Tacil”, “Ta masa” kici hiam cih thu siangtakin hong hilh hi. A diakdiak in Colo-sae 1:15-18 na ah; "Christ pen a kimu theilo Pasian’  lim hi in, a kipiangsak khempeuh lakah tapa upa pen (First born son) ahi hi. Vantung leh leitungah a om na khempeuh, kha thu tawh kisai vangliatna, tote, mi ukte, aana neihnate a kipan a kimu thei hi taleh, a kimu thei lo hi taleh na khempeuh,  Pasian  in  amah  zangin a piangsak hi. Lei-tung a kipanin huih lak a om khempeuh dongin, Pasian in Christ adingin a mahmah zangin a piang-sak hi. Na khempeuh a omma-in amah om khinta a, amah tawh a kipawl manin na khempeuh ama mun sansan ah hoih takin om thei hi. Na khempeuh ah amah alianpen ahih theih nadingin, amah pen pawlpi ahi ama pumpi lutang hi a, Pawlpi’ nuntak-na kipatna hi a, sihna panin a kithosakkik "Tapa cil" ahi hi."

Hih Laisiangtho mun i-et ciangin Topa Jesu pen “Tacil”, “Ta masa” cih thu Laisiangtho khiatna in, anu Maria sung pan a suak masa ahihna, si le sa tawh mihing hong suahna ah, unau sanggam sung ah upa pen cihna na hi masa zenzen lo ahihna thu siangtak leh teltakin kimuthei hi. Hih thu hangin, Topa Jesu pen Laisiangtho sungah “Tacil”, “Ta masa” ci ahih manin, Topa Jesu in pianpih laigui-zom nukhat sung pan asuak sanggam dang nei keileh Laisiangtho in Topa Jesu pen “Tacil”, “Ta masa” naci lo ding hi, ci-in, ngaihsut-na in Laisiangtho thu tellohna leh theihlohna lianpi ahi hi.

Fr.Damian Dal







်