Catholic Kteenna le Kiteenna Apicin lohlam Tangkona
(Catholic Marriage and Annulments)

Catholic Kteenna le Kiteenna Apicin lohlam Tangkona
(Catholic Marriage and Annulments)

Kimaakna / Kiteenna suphiat cih pen bang ahi hiam?
    Kimaakna/ kiteenna suphiat cih sangin, kiteen-na a picin loh/om loh lam tangkona ci-in Catholic Pawlpi’n theizaw a, tua bangin zangzaw hi. Pawl-pi’n akikhen nupate hoihtak hong sittel khitteh, hong ciapteh saksa a picing kiteenna pen atung a pat-in omlo hi ci-in Pawlpi in hong genkhia hi. Hih pen pawlkhatte sap danin Ca-tholic ngeina bang a nupa kimaakna hilo hi, bang hang hiam cihleh kimaak-na cih pen, nupate a kikhen uh ciang le, “Eite nih pen kiteng mah hangin, ahih hang tun omkhawm zo nawnkei ni” ci-in a kicih ciangun (kimaakna) hong om ahi hi. Kiteenna a picin loh/ ahawm ahih lam tang kona zia ah ahih leh, atung a patin tua omkhawp-na/kizopna pen “kiteenna” hi cihtheih nang kisap khat om hi cih, hong tangko khia, hong theihsakna ahi hi. Ngeina bang kiteenna/ tual kiteenna abawl laitak un, a tungah gensa mah bangin, kiteenna apicin nang koppih thu nam nihte lakah khat pen omlo hi kha ding hi. Nupa vai-puak lak ding ciang-in, apicin thukimna omlo zong hi kha ding hi. 

    Pawlpi’n tua nupate itna kipatna, tua itna in om khawmpih ding ciang dong a tunpihna thute sangsiam mahmah hi. Tua bek tham lo-in, amaute tual kiteenna zong kiteenna manmah bangin, ahi in sang a, gam ki-ukna tawh kituak athu man takin kiteng hi, ci-in zong theihpih mah hi. Tua ahih manin, tua tual kiteen-na pan hong piangkhia naupangte khempeuh pen upadi tawh kituak mah hi ci-in Catholic Pawlpi in sang hi. Canon 1137 ah zong hih naupangte pen apicin loh kiteenna pan hong suak, upadi tawh kituak a hong piang nau-pangte hi ci-in hong ciapteh sak hi. Kumpi lampan ahi zong, ngeina tawh ahi zong kiteenna khempeuh Pawlpi in ahi a hong sang hi. Ahi zong kiteenna a picin lohlam tangkona zia ah bel muhdan atuam mahmah hi a, Catholic Pawlpi i thukhen theih-na, thuneihna pen kha lam tawh kisai zaw ahi hi.

Banghangin kiteenna apicin lohlam tangko khia ding kisam ahi hiam?
    Pawlpi in kiteenna pen khantawn ai ahihlam hong hilh hi. Kiteenna pen Sacramentu hong suah ciangin, Pasian gawmsa hipah a kuamah in khen theilo ding hi (Mt 19:6). Ngeina tawh kiteennate ahi zong, tual kiteennate ahi zong hih kiteennate pen upadi tawh kituak kiteennate hi, ci-in hong ciaptehsak Kumpite’n tua kiteennate maaksak theih-na thu aneih uh hangin, Sacramentu a suak ki-teenna pen hong maaksak theilo hi, ci-in Pawlpi’n hong gen hi.

    Tua ahih manin, Pasian maiah mi nih ding a, a kiciam ciangin, amaute kiteenna pen Catholic Pawlpi ciaptehsak kiteenna ahih leh, hih kiciamna pen amaute i nuntak sung peuhmahah kiphiatkik theilo hi. Amaute pumkhat suahna/ kiteenna pen sih dong/ nuntakna bei dong ding ahi hi. Ci nopna ah, kuamah tawh kiteenna thak bawl theilo ding cihna ahi hi.

    Kiteenna man tawh a kiteng peuhmah in a ten pih zi/pasal tawh kizom den hi. Hih bang a kiteng ahih leh, khalam a amau i kizopnate pen ngeina/ tual kimaapna khawng tawh hong phiatsak theilo hi. Pawlpi i mitmuhna ah, ki-maakna cih pen a kiteng sa nupate kikal a sum le paai vai, neih le lam vai, ngeina/tual kiteennate bei sak, tawp bawlbek hi a, khalam tawh kizopnate beisak/tawp sak tuan lo hi.
Hih thu hangin, Catho-lic Pawlpi in kiteenna khat pen Pawlpi ciapteh sak kiteenna ahih leh, ahih loh lam theihna ding, kiteenna apicin lohlam tangkona’ thu bawlzia tawh  sittel uh hi. Thu kankhiatna ah, kiteenna pen apicin lohlam hong kante le amau i teci te’n kiteenna tawh kisai thu khen zumah hong puak uh thute Pawlpi in sittel hi. A picing kiteenna, kiteenna man ahih lohlam, a om lohlam Pawlpi’n hong khensat khitciangin hih mite pen midang khat peuhpeuh tawh kiteng thei dingin suakta hi. A kitenpih ten zong zi neisa, pasal nei sa ahih loh ding kisam hi.

Catholic thuzui ka hih kei leh, banghangin “Kiteenna apicin lohlam tangkona” kisam ding ka hiam?
    Nang pen, catholic thuzui na hi loh hang, catholic thuzui khat tawh na kiteen sawm a leh, hih “Kiteenna apicin lohlam tangkona” kisam thei ding hi. Hi tangkona pen, a kiteen pihsa a zi/pasal pen catholic thuzui a na hikei laileh, catholic thuzui ahilo mi tampi ading haivai mahmah ding hi. Tua ahih leh bang hang Catholic Pawlpi’n tua a omsa kiteen-na sittel a hiam?
    Minih akiteen laitak un, zi/pasal neisa ahilo a suakta minih ahih leh, tua kiteenna pen a picin ki-teenna hi, ci-in Catholic Pawlpi’n ngaihsun hi. Thu bulpi pen ah, catholic thu- zui a hilo monu/mopa i pawlpi ten hih kiteenna pen asan leh, a theihpih leh, Catholic Pawlpi in zong tua mahbang a hong sang hi. Kiteenna pen a kip tawntung dingaa Pasian hong bawlsak sa ahih mah bangin, Catholic Pawlpi’n kiteenna pen a picin leh apicin lohlam sittel kul hi. Banghang hiam cihleh, pawl dangte khat in catholic thukhun sungah aom catholic thuzui khat tenpih sawm ahih man le, tua thukhunte’n tua thuzui nu/pa tawh kisai lai ahih man-in, Pawlpi’ thu khunte tawh kituakin kiteenna bawlkul hi. Atom in cileng, ki-teenna tawh kisai Pawlpi hong hilhnate pen, Pasian thu kham pan a hihna tawh, kuapawl kua pawl om loin, mi khempeuh tawh kisai hi ci-in Catholic Pawlpi’n a um hi.

Kiteenna apicin lohlam tangko khia ding sangin, aomsa kiteenna pen picinglo ahih leh picin sak nang lampi dang omlai thei ding ahiam?
    Om lua hi. Catholic thuzui khat ahih kei a, Catholic thuzui khat tawh a kiteng hi napi, Canon thukhun tawh kituak a kiteng lo (Catholic Siampi khat ahih kei leh, Deacon khat mai-ah teci mi nih tawh), tua thukhunte pan (kituak lo ahih man) kiteen theih nading phalna ngen khalo… akua mahpeuh a dingin, Catholic Pawlpi’n “thu paizia kisam kiteennate” ci-in hih kiteennate hong picingsak kik thei hi. Hi bang dan a bawlsakna pen Pawlpi thuneihna (Administrative process) tawh picin sakna kici hi.
   
    Hih bang thu ah, zi hiam pasal hiam khat in catholic thuzui ahih lam: hih nupate pen phalna omlo a catholic thukhun tawh kituak lo-in a na kiteen lam: tua kiteen-na pen kipuahkik thei nawnloh lam.. cihbang thute mikhat peuh in a kicianin hong lak kul hi. Tua bang a kiteenkhit, a nungsang ciang zong picinsakkik nawnloh lam (kiteennate apicin sakna le, thupha kipiak sakna pen a kibang dan a atamzaw in sangkhial hi) khat peuhpeuh in hong lakkul lai hi. Tuisawpna letmat, Kiteenna letmat copy le, kimaakna lai, hite pen akician akicing teci dingin kiteenna tawh kisai Pawlpi thukhen zum atamzaw in hong sang uh hi. Bang bang ahi zongin, athu a la amun amual tawh kizui in teci hoih gentham cing ding kisam thei hi.
   
    Zi/pasal neisa khat tawh a kitengkik mi khat ading, tua a masa a kiteenna pen Pawlpi’n saipih loh ahi leh, abeisa thute ciaptehna laite tawh thu kibawl theihna (documentary process) khat om hi. Tua pen a omsa ki-teenna tawh thubawlna (ligamen or prior bond) kici hi. Hibang thu kibawlna atamzaw sungah mi khat i a teenpih sawm nu/pa’ aomsa/ amasa kiteenna thute khat peuhpeuh in na na ciamteh thei hi. Diocese sungah om thukhenzum pan in nupate a kisap uh laite khawng hong gen hong hilh a, bang thu bawlzia tawh bawl ding cih zong hong maikai ding hi.
   
    Monu mopate lakah khat in a kiteen masak lai-in tuisawpna a ngah naikei a, tuisawp ding a kisapna pen teci ding a kilak theih leh (a masa a kiteenna pen ama hanga kikhen ahi loh ding kisam hi) upna hang phalpiakna (Peter hongpiak phalna thupha) tawh kiteen theih nang Pawlpi’ phualpi ah thu kipuak thei hi. Pawlpi’ phualpi in a kiteng ding a a awi leh, athak a a kibawl kiteenna in tua Sacramentu ahi lo a masa kiteenna pen phiatkhiat sak hi.

    Nupa khat a kiteen tungun, kua ma’n tuisawpna a ngah nailo, tun a maute lak pan khat in tui kisawp nuam in, catholic thuzui khat tawh a kiteng nuam ahih leh, a zi/pasal masa pen tuisawpna a ngah nailoh lam mi khat peuhpeuh in teci pang thei ding ahih leh, Paul hong piak phalna thupha tawh kiteng thei ding uh hi. Hi bang dan munah, Siampi Lian Bishop pa ahih kei leh, a palai in amaute tui a kisawp nailoh lam kiciansak khitteh, a kibawl thak kiteenna hangin Sacramentu ahi lo a masa ki-teenna pen hong phiatkhiasak hi. Tua tuisawpna le kiteenna a lunggulh monu/mopa in tui kisawp masa kul hamtang hi.

Aphamawh a, zuihding thubulpi
    Nang pen kiteenna a picin lohlam tangkona na kisap le kisap loh khensat dingin a kankan na hihleh, hih gencianna/ theihsak-nate pen phattuam thei ding hi. Bangbang ahih zong, hibang dan thu bawlnate na zatsawm a leh, lungsim ah koih den ding thu bulpi khat ah: nang na hi a, teen-pih ding a na lunggulh nu/pa ahi zongin, a omsa kiteenna tawh thu bawl ding nasawm a leh, nang hong kem Siampi pa thei sak hamtang in. Na kiteenkik ma-in, Pawlpi in a omsa kiteenna pen: ciaptehna teci laite tawh thubawlna maw, phalpiakna thu-phate tawh maw, ahih kei leh kiteenna picin lohlam tangkona tawh maw … khat zawzaw tawh bangci bang danin hong phelsak thei ding ahiam cih (Pawlpi in) hong etsakkul man ahi hi.

Translated by Gnaut