CATECHISTS ON THE FEASTDAY OF
St. Luke the Evangelist
HAPPY FEASTDAY to Our Beloved CATECHISTS ON THE FEASTDAY OF
St. Luke the Evangelist (18.10.2020) Sunday
**********************
Mi Siangtho Luke (Lungdamna laisiangtho a at pa) ii pawi ni pen Thuhilh Sia te pawi ni-in ih Diocese Calendar sungah ih ciamteh hi. Tukum (2020) The Official Catholic Directory of Myanmar Laibu pi sungah ei Kalay Diocese sung ah Thuhilh Sia vekpi mi (170) om hi ci-in ki ciamteh hi. A diak diak in ei Zogam ah thuzui mite Pasian thu a hong musak masa leh a hong hilhcian masa pen ei mite sung pan en leng thuhilh Sia te mah hi masa hi.
Nidang hunlai-in ei mi sung pan Siampi ih om ma in zong Piantit gam pan hong pai (MEP) Siampi te hong hilh Pasianthu nungta te Thuhilh Sia te in hong makaih in hilh cian na ahong neih manun eite in Pasian thu a thei thei ih hi hi. Tu-in zong Siampi te tawh kipawl in thuhilh siate in ih Zogam Pasian thu tawh hong khangto sak uh a hih manin nakpi takin Thuhilh Sia te tungah lungdam koh huai mah mah hi.
A diak diak in Siampi te a tun pak pak loh na khua te leh innte ah Thuhilh Sia te in Pasian thu nungta te hilhcian na hong nei a hih manin ih Diocese aa dingin lungdam huai mah mah hi. Ei thuzui mite in zong ih Sia te tungah lungdam ih koh ding kisam pha mah mah hi.
Tua a hih manin ih Diocese sungah St. Luke pawi ni pen THUHILH SIA TE PAWI NI in ki ciamteh in Siampi te in a Parish Sung uh a om Sia te aa ding Pawi bawlsak in Pahtawina, thu ngetsak na hun neih dingin ih Diocese buppi in khen sat na ki nei hi. Tua tawh kizui-in Siampi te leh thuzui mite in Siate Pawi ni pen tu covid-19 hun tawh kituak in a thupi thei pen in ih bawlsak nang, thungetsak na leh Letsong piakna te ih neihsak nang in hih RVA Tedim Chin Service pan hong tangko khia ing.
Ih Biak Topa Pasian in ih Thuhilh Sia te mailam hunte ah thupha hong piak sak sem sem nang leh ei thuzui mite tungah zong Thuhilh Sia te a pahtawi zo den, amaute tungah lungdam a ko zo den te ih hih zawh nangin thungen ciat ni.
A hong nusia sa Thuhilh Sia te Kha aa ding leh a nungta lai Thuhilh Sia te aa ding Missa Biakpiakna te bawlsak in thungetsak na leh piak khiatna te ihneih kim zawh nang hanciam ciat ni. Ih Biak Topa Pasian in note thupha hongpia ta hen! Amen.
By- Rev. Fr. Joseph Zo Mung (Director of OSC & RVA Tedim Chin Service) Kalay Diocese.
#RVATedimchinservice #KalayDiocese #Catechist #feast
2020-10-17 20:20:18
