Recollection of Diocesan Staff Members
Recollection of Diocesan Staff Members (30.6.2023)
****
Tuni Kalay Diocese Centre, Kalaymyo aa om Zum nasem tengin Khasim in a bawl ngeina uh Pasian thu Lungngaihna pen Kalaymyo,⁹ Diocesan Centre ah bawl uh hi.
Tua sungah Pasian thu lungngaihna pen Rev. Fr. Andrew Go Khan Nang (Director of KMSS- Kalay) in hong makaih hi.
Amah in Laisiangtho (Mt 25:14-30) bulphuhin Pasian hongpiak Talent te ih khansak ding a kisapna thu hong gen hi.
Tua banah ei Kalay Diocese sunga om Zum nasem te in ih nasepna ciat pan ih tawp ciang, ih tha man bang ngah ding ih hi hiam ngaih sun ciat ni. Ih sepna peuh ah ih hih theih zahin ih han ciam leh hih Laisiangtho sunga bangin "A hoih nasem pa/nu" cih min ih ngah ding hi.
"A topa in ama kiangah, ‘Hoih mahmah hi, a hoih a muanhuai nasempa aw, hoih hi! Nangmah in a thu neute’ tungah na muanhuai zo hi. Thu tampi nang kong uksak ding hi. Na topa tawh lungdam khawm in" ci-in nitawp ni ciang ih sep thaman thukhen na ah limtak in, lungdam takin ih san zawh nang hanciam ciat ni ci-in thapiakna nei hi.
Tua khitciang mawhsutna leh Khikhinna te a ngeina bangin kinei ⁷suak hi.
Missa Biakpiakna pen Rev. Fr. Joseph Thang Nen Zo Mung ( Director of KOSC & RVA Tedim Chin) in hong makaih hi.
A mah in tuni aa ih sim Lungdamna Laisiangtho (Mt 8:1-4) na bulphuhin "Phak natna a nei mipa in tua hun lai a Judah Ulian te thukham palsatin upna, muanna leh dam nopna takpi tawh Topa Jesu kiang a zuatna leh Topa Jesu in zong Judah Ulian te thukham palsatin itna tawh phak natna a nei mipa lawngin damna a piak na thu te tu hun laitak aa thupiang te tawh gentehin ih mitkha ah ih muh theih dingin hilhcian na nei hi.
A mah in miphak pa ii damna a ngah nopna thu pen bang mah dangin khak tan zolo a hih manin a mah in haksatna tampi kantan in Topa Jesu mai a tungzo a hih na thu leh Topa Jesu in miphak pa a itna pen bangmah dangin khak tan zolo a hih manin miphak pa in damna angah a hihna thu te phawkin eite in zong na hoih khat peuh peuh ih deih ciangin ih sep ngeina sangin a thupi zaw in hanciam ding a kisapna leh hatsatna te in hong khaktan mah leh zong tua te kantan in ih sep teitei ding a kisapna thu te hong gen hi.
Tu ni pen Zum nasem alut thak zong om ahih manin ni dang sangin mi kitam zaw in Siampi (4) leh Zum nasem mi (50) val bang kihel thei hi.
Nidang sangin thungetna leh lasakna te zong nopci tektek in tha kingah mahmah hi. Kikhop aman ciang Sunan nekna tawh tuni hun ki man siang hi.
2023-07-03 00:33:25
