Lailo Khua Biakinn Kong Hon Pawi Vaidawnna (18.3.2022)

***************

Tedim Myoma Parish Priest Msgr. John Khuppu ii vaihawm siamna tawh Lailo khua ah St. Joseph Biakinn thak Thupha pia dingin Kalay Diocese hong cing hong kem Bishop Felix Lian Khen Thang leh Siampite March kha ni 18 ni-in va pai-in Lailo khua pan thuzuite in Zo Ngeina tawh vaidawnna na sia takin bawl uh hi. A video zong hong ki post lai ding hi.

           Biakinn thak pen that nih hi-in a nuai hall khan in ki bawlin pi 10 sang hi. A tung dawl pen Biakinn pi sung hi-in pi - 18 sang hi. A dung a sau na pen pi - 90 pha in a vai, a zaina pen pi (45) pha in hoih mah mah leh etlawm mah mah hi. Lailo khua sunga Biakinn teng lak pan a hoih pen hi-in, Kalay Diocese sunga Siampi (Parish Priest) te om na Biakinn pawl khat sang zong hoih zaw lai hi. 

        Biakinn lam na sum bei vekpi pen (2011 October pan 2020 December) kha dong = 525,253,930 Ks bei hi ci-in lai bu sungah ciamteh uh hi. A zawh siang dong pen a bei vekpi ki cian lian lo in teng tul sagih (7000) val bei ham tang dingin ki um mawh hi.

        A khua khua ah thuzui mite hanciamna pen thangah huai thei mah mah hi. Biakinn hoih a nei zo nailo khua te aa dingin zong etteh huai mah mah hi. 

         Siadawpa in vaitun thu gen na ah Lailo khua thuzui mite ii hanciamna te tungah a thangahna pen Biakinn hoih pen upna nei mite bek in a lam zo hi ci-in pulaak khia hi. Tua banah Biakinn sungah Biakpiakna a ki pia ding ahih manin Biakinn sung om zia te zong ih siam ding ki sam hi ci-in vaitun thu gen na ah thuzui mite tha hongpia hi.

#RVATedimchinservice

#KalayDiocese

#rva #Lailo