SAIZANG ZONE HON PAWI 6th May 2022
SAIZANG ZONE HON PAWI (6.5.2022)
Saizang Zone hon pawi pen Kalay Diocese hongcing hongkem Bishop Felix ii makaihna tawh Missa Biakpiakna May 6, 2022 ni-in nuam takin ki bawl hi. Missa Biakpiakna sungah Siampi (19) kihel thei-in Nungak Siangthote, Thuhilhsia te leh thuzuimi mimal in (1000) val bang kikhawm thei in tha kingah mahmah hi. Khua kim pan in zong zantam in pawi simin mi tampi hong pai uh ahih manin nitak nih sung len khopna zong noptak in ki bawl hi.
Hih Zone hon pawi pen ih Siampilian Bishop Felix Lian Khen Thang ii Siampilian suahzawh kum (16) a cin ni zong tawh kituak ahih manin Siadawpa pahtawina zong tua ni mahin ki bawlin, tua ban ah Thuhilhsia Titus Nang Do Mung ii Sia sepzawh kum (25) cinna Silver Jubilee Pawi tawh zong kigawm in Pawi nam (3) a ki bawl khawm a hi hi.
Missa Biakpiakna a man khit cingin Msgr. John Deng Cin Khup in Zone honna tawh kisai in Canon Law tawh kituak in a kigelh (Decree) Laipi sim khiatna hong nei hi. Tua khitteh Bishop Felix in tua laipi pen Saizang Parish Priest leh Saizang Zone Vicar Forane thak a hi Rev. Fr. John Zo Khan Mung tungah piakna hong nei hi.
Saizang Zone sungah 1. Saizang Parish 2. Heilei Parish 3. Suangpi Parish 4. Mualbem Parish 5. Vangteh Parish cih bangin Parish (5) leh Kaptel Mission Centre ki hel hi. Diocese leh Parish te kizopna a baih zawdeuh ding cih ngimna tawh Diocese sungah a kisapna dung zui-in Zone thak a ki hong hi-in tu-in ei Kalay Diocese sungah 1. Kalay Zone 2. Tedim Zone 3. Khampat Zone 4. Tonzang Zone leh 5. Saizang Zone cih bangin Zone (5) om ta hi.
Zone ih cih pen mangkam in (Vicariate) kici-in ei kam in a dawl dawl in ukna gam ki ci hi. Tua mun a om thunei te pen Vicar Forane ki ci-in amaute ii na sep vaipuak ding pen Diocese Centre leh Parish te kizopna ah a kisapna tawh kizui-in Palaai a sem dingte a hi uh hi.
Ih Diocese sungah a dawl dawl in kizopna, thuneihna leh ki makaihna te pen Diocese, Vicariate (or) Zone, Parish, Parochial, Village cih bangin om dimdiam in Parish, Zone, Diocese cih te pen mitamna tawh ki zui-in a kisap hun hun in a ki behlap to to thei ahi hi. Tu-in ih Diocese sungah Tedim Zone panin Saizang Zone ci-in Zone thak khat ki behlap zo ahih manin hi bangin khantohna ahongpia ih Biak Topa Pasian tungah ih lungdam hi.
Thuzui mite sungah khat vei vei ih kammal zat dan pen Pawl dangten hong lawh thei a hih manin Diocese ki khen, Zone kikhen, Parish kikhen cih bangin ki zang kha thei hi. Pawldang te pen a ki pumkhat zawh nawnloh cingun a ki khen uh ahih manin pawl kikhen cih pen amaute aa dingin man mahmah hi. A hi zongin ei Catholic Pawlpi aa dingin kikhen cih kammal pen zat huai lo zaw hi. Eite pen a kikhen hi lo in a ki pumkhat den ih hih manin Diocese thak, Zone thak, Parish thak khat khanto (kibehlap) cih bangin ih zat theih ding zong kisam pha mah mah hi.
Catholic Pawlpi sungah thuzui mite khang semsem in atam na tawh ki zui-in Parish thak, Zone thak a ki hong, a ki beh lap hi zaw in a kikhen hi lo hi cih thu zong ih phawk den dingin hong deih ing. Ih Diocese sungah Zone thak khat ih hon zawh manin Pasian gam ih tangzai sak zawh sem sem nang Pa Pasian kiangah thu ngen in hanciam ciamna tawh mapang khawm ciat ni.
By- Fr. Joseph Zo Mung
2022-06-09 01:11:58
