Asia Gam ma om Siadaw teng kipawlna Federation of Asian Bishops' Conferences (FABC) ci-in kum sim in thu kikupna nei uh hi. Tu tung aa meeting pen a (23) veina hi-in Thai Gam, Bangkok, St. Gabriel Foundation ah ki bawl hi. HIh FABC ki pawl na pen (1970) kum pek pan in a ki bawl hi-in hih Siadaw te kipawlna sungah Media tawh kisai Vaipuak nei Siadaw teng leh RVA tawh kisai vaipuak a nei Siampi te thu kikupna ki nei hi. Radio Veritas Asia (RVA) ci-in Media pan Pasian thutangko na Catholic Media Asia Gam ah a ki pat zawh pen kum (50) maikum (2019) April kha ciangin cing ta ding hi. Hih FABC-OSC (Office of Social Communication) kipawlna sung ah Laity Commission, Family Commission, Youth Commission, AsIPA, Human Development cih bangin a tuam tuam in ki pawl na om in tu tung thu kikupna panin Media Education, Digital Marketing cih Desk te zong a thak hon thuah ding ki thukim hi. Asia Gam tuam tuam sunga (RVA pan Pasian thutangkona nam 22) kinei-in tua te sungah ei (Zopau = Tedim pau) tawh zong ki tangko a hih manin ei Zomi te aa dingin zong a lungdam huai pha diak thu khat a hihi. Pasian thu leh leitung thu tuam tuam te (Thuman thutak) a kitangko na Media pen leitung ah Catholic Media bek om hi. Tua a hihmanin Vatican Website te, Vatican News te, FABC Website, FABC Papers cih te lai bu tawh hi ta leh Online pan hi ta leh ki en thei, kisim thei hi. RVA Tedim Chin Service panin zong Zopau tawh thu manpha takpi tak hong ki khah khia hi. Facebook dang tuam tuam te leh thu kician lo tuam tuam te ih sim sangin Catholic Media te sim leng kha nuntak na ding leh leitung nuntak na ding lampi man hong lak in ki ciang mah mah lel hi. Fb Page RVA Tedim Chin Service pan Nisim aa a kisim Laisiangtho te a laimal mah mah leh a thu tawh hilh cian na nisim in hong ki nei hi. Tua bek tham lo in Vatican News, Pope ii Twitter sunga a laiat te leh Misiangtho te thu gen te cih bangin nisim in hong ki khah khia den hi. Tua te ih Fb te ah share in ih sim, ih ngaih ciat ding leh ih nuntak pih zawh ciat nang hanciam ni. Hih Catholic Media te pan in thuman thutak hong ki hawm khia den a hih manin lungdam huai mah mah hi. Tut mun pan a kingah ziau thei a hih manin lawpna tawh sang ciat ni.