Happy Chin National Day (20.2.2020)

 -------------------------------------------------

(F) February Sawmnih ni Zomi Namni hi ci-in eite in ih Zomi Nam Ni phawk in Pasian tungah lungdam ih ko den hi. Zomi Nam Ni a hong tun sial sial in ih ngeina te phawkin ih minam buppi in ki pawl khawmin pawi ih bawl thei zel hi. Pasian thu lam ah zong ih minamni thupi sakin ih minamte Pasian in ih om om na munte ah thupha a hong piak nangin thu ih ngen den hi. Tuni ih Zomi Namni in eite Pasian thu tawh a hong makaih, Pasian leh mite tawh hong kilem sak, ei Zomi te in Pasian thu nungta te teltakin ih theih siam nang in a hong pattah, gal leh sa tuak mah ta leh a gam ah ciah kik lo in eite a hong sih pih ngam, ka Tuu te ka nu sia kei ding hi ci-in Japah gal lai-in Mikang Pasian nasem dangte khempeuh Khamtung gam pan amaute gam ah ciah kik uh hi mah ta leh ka Tuu te ka nusia kei ding hi ci-in, eite a hong nusia lo Tuucing hoih Piantit Topa te ih phawk ding ka deih hi. Amaute hangin ih khamtung gam ah Pasian thu nungta te kithei telin, Pasian deihna tawh kituakin ki-it kilemna leh khantoh na Zomi te in a ngah ih hih lam ih phawk ding hong deih ing. Tua (MEP ) Piantit Topa te sungpan tu laitakin a makai pipa a hi Rev. Fr. Gilles Reithinger (Superior General of MEP) in tuni dongin hong nusia lo in tu nung Febuary kha 16 ni-in St. Mary's Cathedral Biakinn pi ah Siadawpa leh Siampi te thuzui mi (1000) val tawh Missa Biakpiakna hong bawlpih uh hi. Tu-in amaute hong makaih na hangin ih Zogam (Khamtung gam) ah Pasian thunungta te ki thei tel in, nidang lai in Dawi thoihna, Dawi Siampi pan tu-in Pasian Siampi Suahna, Pasian deih, Pasian ii a lungkim, Pasian san theih  Missa Biakpiak na Zomi te in a sang thei leh Zomi te in a pia thei (abawl thei) ih hih manin ih Biak Topa Pasian leh amaute tungah ih lungdam mah mah hi. Tuni Zomi Nam Ni a (72) vei na ih bawl na sungah ih Zomi te sungpan Pasian tungah Missa Biakpiakna a pia thei mi Pasian Siampi a mimal (200) val bang pha ding ih hih manin Ih Biak Topa Pasian tungah nakpi takin ih lungdam mah mah hi. Mailam hunte ah zong Ih Biak Topa Pasian in ih Zomi te tungah Ki-it kilemna, Ki pumkhatna, Cidamna, Pilna Siamna, Hauhna te aa ki pan Pasian thu tawh khantohna namkim te hong pia sem sem ta hen! Amen. Pasian hongpiak thupha te ih phawk theih sem sem nang deihna tawh St. Mary Cathedral Biakinn pi ah tunung (16 Feb) ni-in a kila mante hong post ing. (Z) Zomite Hanlungciam Khangto Diam!.

Laigelh, Rev. Fr. Joseph Thang Nen Zo Mung

Director of Social Communication & RVA Tedim Chin Service

Kalay Diocese